Read Makassar Version – KITTA' MATANGKASA PANGNGEBARANG 26 Bible Online

PANGNGEBARANG 26 - Makassar Version – KITTA' MATANGKASA bible

PANGNGEBARANG 26

¹Sanrapang bosi ri wattu timoro', siagang bosi es ri wattu bambang, kamma tomminjo tasiratangai nipalece tau toloa.

²Sanrapang jangang-jangang anri'ba' siagang allayang ri alla', kamma tomminjo pattunraya takkulleai nataba tutenaya nasala.

³Musti nisa'mangi keledaia, jaranga musti nicamboki, kamma tomminjo tau dongoka musti nitunrungi.

⁴Tau ampialiai pakkuta'nanna tau dongoka, sangkammai dongo'na siagang anjo taua.

⁵Pakkuta'nanna tau toloa musti nipiali tongi pappiali tolo, sollanna naasseng kalenna lapung tau akkuta'nanga angkana teai tucara'de' sangkamma napikkirika ri kalenna.

⁶Assuro tau tolo untu' angngerang kabara', sanrapangi nipolong bangkeng kalenta siagang a'boya bala.

⁷Sanrapang tau peso' ampakei bangkenna, kammaminjo tau toloa appakainga'.

⁸Appalece ri tau tenaya pangngassenganna, sanrapangi anynyikko' jarre' batu ri patte'.

⁹Sanrapang painung appasulu' katinting battu ri limanna, kammaminjo tau toloa appakainga'.

¹⁰Inai appajama tau tolo yareka sambarang tau lappakarugi tau jai.

¹¹ Sanrapang kongkong angkanrei ammotere' langngena, kammaminjo tau toloa ampa'mole-molei kadongokanna.

¹²Tau tolo dudua bajikangngang iji na tau nakanaya kalenna cara'de'.

¹³Lapung tau malasaka nangai ammantang ri balla'; nakana, “Nia' singa pantarang, gassingka nakokkoka' ri tangngana aganga.”

¹⁴Sanrapang pakke'bu' tapputaraka ri engsele'na, kammaminjo lapung tau malasaka ambale'-baleki kalenna rate ri tampa' katinroanna.

¹⁵Nia' tau teai sipato' malasa'na; manna anynyoanga kanre mae ri bawana kuttu tonji.

¹⁶Lapung tau malasaka nakanai kalenna la'bi cara'de' na tujua tau annabaya pappialinna.

¹⁷Tau ampantamakai kalenna ri pa'beserang teaiya urusanna sanrapangi tau anjakkalaka kongkong liara' ri tolinna.

¹⁸Tau annipua, nampa nakana, “A'bonga-bongakuji bawang,” sangkammai tau pongoro' akkarena sanjata niaka bahayana.

²⁰Punna la'busu'mo kayua, matemi pepeka; punna lapung tau boncoro' bawaya tenami, ammari tommi pa'beseranga.

²¹Sanrapang cumika siagang kayua tuli amparinrai pepeka; kammaminjo tau pabesereka sanrapangi tau attunu.

²²Anjo appitinaya bajiki kasia'na; nangai naa'lu' taua.

²³Sanrapang uring butta nisapu siagang pera', kammaminjo tau te'nea ri bawana, mingka ja'dalaki atinna.

²⁴Tau mangngabirissia te'nei kana-kananna mingka atinna rassi balle-balle.

²⁵Manna nasombere', teako patappakki; lanri kabirisanga angkoasai atinna.

²⁶Manna nacokkoi kabirisanna, sikontu taua naciniki kaja'dallanna.

²⁷Inai ampangngekeangi kali'bong paranna tau, lata'loposoki antama' ri anjo kali'bonga. Inai appagulung batu untu' ampitujui paranna tau, kalenna lanatuju anjo batua.

²⁸Amballe-ballei paranna tau, sangkammai angkana nikabirisi. Kana-kana te'nea angngerangi bala.