Read Makassar Version – KITTA' MATANGKASA PANGNGEBARANG 27 Bible Online

PANGNGEBARANG 27 - Makassar Version – KITTA' MATANGKASA bible

PANGNGEBARANG 27

¹ Teako lompo bicara ri passala' allo ammukoa, lanri tanuassengai apa lakajarianga sinampe'.

²Teako palecei kalennu, boli'mi kamma tau maraenga anggaukangi anjo kammaya, ba'lalo tau tenaya nuassengi anggaukangi.

³Anjo batua siagang kassika ringang iji, punna nipasanrapang pa'risi' pa'maika napakamma tau toloa.

⁴Anjo larroa pallaki siagang ammanraki, mingka inai akkulle attahang andallekangi akkimburua?

⁵Bajikangngangi pappasaile nilambusianga kala pangngamaseang tenaya nanipasuluki.

⁶Aganga natunrungki' siagang pangngamaseang, mingka musua narakakki' siagang racung.

⁷Punna bassoro' taua, manna bania nitolla' ngasengi; punna cipuruki taua, manna paika nyamang ngaseng kasia'na.

⁸Tau ambokoiyai balla'na, sanrapang jangang-jangang ambokoi ru'munna.

⁹Sanrapang minynya'-minynyaka siagang bau'-baukanga appakasannangi pa'mai', kammaminjo kabajikanna aganga appakamalei nyawa.

¹⁰Teako kaluppai agannu yareka aganna manggenu. Teako appalakki bantuang ri sari'battannu lalang kasukkarang; a'matu-matuangngangi siampi' balla'nu kala sari'battannu bellaya.

¹¹Ana', paralluko cara'de', sollanna sannang nyawaku siagang akkulle appiali punna nicalla'.

¹²Tau cara'deka a'lili punna nia' nacini' bahaya; tau toloa a'jappa tulusuki nampa nituju ri bala.

¹³Inai ero' antanggongi inranna tau maraenga, siratangi nialle baranna untu' a'jari panynyikko' janji.

¹⁴Inai a'bari sallang assa'ra lompo ri bari'basaka mae ri aganna, nikanai appasulu' pattunra.

¹⁵Turiballa' pa'beseranga sanrapangi sa'ra bosi turunga sila'busu' allo.

¹⁶Tena olona nisuro ammakkang, sanrapang anging takkullea nitahang siagang minynya' takkullea nikangkang.

¹⁷Sangkamma bassi baja ampakatarangi bassi bajaya, kamma tomminjo rupataua appilajaraki battu ri paranna tau.

¹⁸Inai ammarakai poko' rappo-rappoang, lanakanrei rapponna. Laningai palayanga punna napakalompo karaenna.

¹⁹Sanrapang je'neka napaccarammengi tanja'nu, kamma tomminjo atinnu ampappicinikangi kalennu.

²⁰Ri linona tau matea, tuli nia' tampa'; kamma tomminjo kaerokanna rupa taua tena sanggana.

²¹Bulaeng siagang pera' niuji lalang ri pepe'; taua niassengi battu ri sipa'na mae ri pappalecea.

²²Manna pole nitunrung sarring tau toloa, talalanynyaki katoloanna.

²³Parakai baji'-bajiki olo'-olo' piaranu,

²⁴lanri kakalumanynyangnganga poro sinampe'ji, ba'lalo koasa untu' ammarenta tena natuli satunggu-tungguna.

²⁵Rukuka ri paranga siagang ri monconga nibattasaki siagang nipasse'rei untu' anjo olo'-olo'nu, mingka ilalang kamma-kammana anjo attimbomi pole ruku'-ruku' berua.

²⁶Battu ri bulunna sikamma gimbala'nu anggappako pakeang, siagang battu ri ballinna bembenu sipa'gang akkulleko anggappa pammali butta beru.

²⁷Battu ri sikamma bembenu maraenganga akkulleko anggappa dadi' untu' kalennu siagang bone balla'nu kammayatompa palayang-palayannu.