Read Makassar Version – KITTA' MATANGKASA PANGNGEBARANG 28 Bible Online

PANGNGEBARANG 28 - Makassar Version – KITTA' MATANGKASA bible

PANGNGEBARANG 28

¹Tau ja'dalaka lari nampa tena angngondangi, mingka tau lambusuka, barani sanrapang singa.

²Punna doraka bansaya, assisambe-sambeangi pamarentana; punna cara'de' pamimpinga, lattahangi anjo bansaya siagang latuli kassaki.

³Pamarenta anjallakkangai tu kasi-asia, sanrapangi bosi sarro ammanrakia kattoang.

⁴Inai tanjampangiai hukkunga, agangi tau ja'dalaka; inai mannuruki ri hukkung, nabaliangi tau bambalaka.

⁵Kaadelanga tanapahangngai tau dorakaya, mingka tau anynyombaya ri Batara, napahang tojeng-tojengi.

⁶Bajikangngangi tu kasi-asi lambusuka pa'mai'na, kala tau kalumanynyang jekkonga.

⁷Turungka mannurukia ri hukkung, iami tu cara'de'. Mingka tau sileporanga tau pa'laboanga napakasiriki manggena.

⁸Inai a'jari kalumanynyang lanri appamanaki doe' siagang angngalle passawallang ta'liwa'-liwa', latu'guruki anjo barang-baranna mae ri tau mangngamaseanga ri tu kasi-asia.

⁹Punna tena numannuruki ri hukkunNa Allata'ala, latakkoa' tongi Allata'ala ri pappala' doannu.

¹⁰Inai anynyonyoki tau lambusuka sollanna a'gau' ja'dala', ia kalenna latu'guru' antama' ri sikko' nitannanga. Tau ci'nonga pa'mai'na lanibarakkaki sa'genna mate'ne.

¹¹Tau kalumanynyanga tuli nakana kalenna cara'de', mingka tu kasi-asia, bajika akkala'na, naassengi angkana inai kalenna.

¹²Punna tau baji' ammarenta, sannang ngasengi taua, punna tau ja'dala' ammarenta, accokkoi ra'yaka.

¹³Inai ancokkoi dosana tena nalaupa'. Inai angngakui, lanabokoi, nampa laNikamaseang ri Batara.

¹⁴Tuli pakalompoi Batara, na nulamate'ne. Punna nubaliangi, langgappako bala.

¹⁵Tau ja'dalaka ammarenta ri tau kakuranganga, sanrapangi singa ammarrunga sa'ranna yareka beruang a'bakkaya.

¹⁶Tukoasa anjallakkangai tau maraenga, tena akkala' baji'na; tukoasa birisika ri kajekkonganga lattaung taungi ammarenta.

¹⁷Tau ammunoa tulusu' kammai tuniondang na kasia' sa'genna narapi' a'jala'na; manna sitau takkulle antahangi.

¹⁸Tau tenaya callanna lalang tallasa'na lasalamaki. Tau a'lekko-lekkoa tallasa'na, latu'guruki.

¹⁹Pamarri anjama terasaka lagannaki ri kanre; tau ampela'-pelakai wattunna lakakurangangi.

²⁰Tau lambusuka laNibarakkaki ri Batara, mingka tau eroka linta' kalumanynyang, takkulleai naliliang hukkunganga.

²¹Tabajikai nipasimmara'-maraeng taua; mingka nia' todong haking ero' a'gau' jekkong lanri ero'na anggappa sike'de' doe'.

²²Tau angngoaya eroki linta' kalumanynyang; tanaassengai kalenna angkana tasalloai nakakasi-asiang antujui.

²³Tau appasailea, kale'bakkanna la'bi nipakalompoi na tau appalecea.

²⁴Inai allukkaki tau toana siagang nakana teai dosa anjo kammaya, sangkammai palukka'-palukka' maraenga.

²⁵Punna kaparalluang kaleaji nicinikiang lappaumbai pa'beserang; la'bi upakkangngangko punna tappakko ri Batara.

²⁶Inai manrannuang ri panggappang kalenna, tabajikai akkala'na. Inai ampinawangi ajaranna tau cara'deka lasalamaki.

²⁷Inai assare ri tu kasi-asia tena nalakakurangang. Inai tanjampangiai kaparalluanna tu kasi-asia lanatabai pattunra.

²⁸Punna tau ja'dala' koasa, accokkoi ra'yaka; punna panra' tau ja'dalaka, tau adeleka lammarenta siagang laluasa.