Read Makassar Version – KITTA' MATANGKASA PANGNGEBARANG 29 Bible Online

PANGNGEBARANG 29 - Makassar Version – KITTA' MATANGKASA bible

PANGNGEBARANG 29

¹Inai tulusu' tappilangngeria nipakainga', lapanraki ri se'reang wattu, na takkullea nipakabaji' poleang.

²Punna tau adele' ammarenta, rannui ra'yaka. Mingka punna tau ja'dala' koasa, sessai ra'yaka.

³Inai angngai kacara'dekanga, napakasannangi pa'mai'na manggena. Inai sileporang siagang baine salaya, napa'laboangi doe'na.

⁴Punna naparhatikang pamarentaya kaadelanga, lakassaki pa'rasanganna. Mingka punna doe' bawang naparalluang, laruntungi pa'rasanganna.

⁵Inai ampalecei paranna tau, attannangi sikko' untu' kalenna.

⁶Tau ja'dalaka niallei ri sikko' lanri dosana, tau lambusuka sannangi nakasia' siagang mate'nei.

⁷Tau bajika naassengi ha'na tau lammaya, mingka tau ja'dalaka tanapahangai.

⁸Tau pacalla-callaya akkullei nakaco kotaya, mingka tau cara'deka napakasannangi katallassanga.

⁹Punna akkara-kara tau cara'deka siagang tau toloa, anjo tau toloa a'jallo'ji bawang siagang ammakkala' sa'genna appaumba karicuang.

¹⁰Tau lambusu' pa'maika lanikabirisi ri tau pabuno-bunoa, mingka nijagai ri tau bajika.

¹¹Tau toloa napappicini'-cinikangi larrona, mingka tau cara'deka sa'baraki siagang natahangi larrona.

¹²Punna naparhatikang pamarentaya kabara' balle-ballea, la'jari ja'dala' ngasengi sikontu pagawena.

¹³Tu kasi-asia siagang tau manjallakkanna nia' sangkammanna: para nisarei mata ri Batara untu' anciniki cayana katallassanga.

¹⁴Punna naalleangangngang karaeng ha'na tau lammaya, lattaung-taungi lammarenta.

¹⁵Pangngajaranga siagang pappasailea napa'jari taua cara'de'. Ana' tuli niturukianga ero'na lanapakasiriki amma'na.

¹⁶Punna tau ja'dalaka koasa, pila' katambangi gau' salaya. Mingka lanaciniki tau lambusuka kapanrakanna tau ja'dalaka.

¹⁷Ajaraki ana'nu, nanasareko kasannangngang, siagang a'jari panynyaleori ri kau.

¹⁸Bansa tenaya Nipimpingi ri Batara a'jari bansa tuli rassi karicuang. Mate'nei taua ia mannurukia ri hukkunNa Batara.

¹⁹Ataya takkulleai niajara' siagang poro kana-kana bawang. Napahangi, mingka tena naparhatikangi.

²⁰Jaiangngangi panrannuanna tau dongoka, kala tau jaia bicaranna natappikkira la'bi riolo.

²¹Ata tuli nipalecea battu ri rungkana, kale'bakkanna la'jari tamappilangngeriai.

²²Tau lintaka larro napa'jari taua jai a'besere' siagang doraka.

²³Tau tampoa lanipakatunai; tau tuna pa'maika lanipuji.

²⁴Tau assamaturuka siagang palukka', sangkamma nakabirisi kalenna. Punna a'bicarai silambusu'na ri pangadelang, lanipitabai hukkungang. Mingka punna a'merekiji bawang, lanitunrai ri Allata'ala.

²⁵Mallaka ri panggappana taua, angngerangi kasusaang. Tappakko ri Batara, na nulaamang.

²⁶Jai tau nangai a'boya-boya pa'mai' ri tukoasaya, mingka assarea kaadelang, Bataraji bawang.

²⁷Tau bajika tena nasannang mae ri ja'dalaka; tau ja'dalaka nakabirisi tau bajika.