Read Makassar Version – KITTA' MATANGKASA PANGNGEBARANG 3 Bible Online

PANGNGEBARANG 3 - Makassar Version – KITTA' MATANGKASA bible

PANGNGEBARANG 3

¹Teako takkaluppai ri apa le'baka kuajarrangko, ana'. Tuli u'rangi parentaku,

²sollanna la'bu umuru'nu siagang salewangang tallasa'nu.

³Paralluko tuli tappa' siagang tamamminraya mae ri Allata'ala siagang mae ri parannu tau. U'rangi anjo kammaya siagang boliki ri pa'mai'nu,

⁴ sollannu ningai siagang nipakala'biri' ri Allata'ala siagang ri rupataua.

⁵Tappakko mae ri Batara sibatu pa'mai', siagang teako na pammahannu bawang nurannuang.

⁶Angngu'rangiko mae ri Batara lalang sikontu apa nugaukanga, na Iami lampicinikiangko nikanaya carana attallasa' bajika.

⁷ Teako nanukana kalennu la'bi cara'dekangangko na sitojennaya; turuki Batara siagang pakabellai kalennu battu ri ja'dalaka.

⁸Anjo panggaukanga la'jari sanrapangi pa'balle mae ri kau, ia lampakabajiki batangkalennu siagang pa'mai' mailalannu.

⁹Pakala'biriki Batara siagang assareko koro'bang kaminang bajika battu ri barang-barang wassele' buttanu,

¹⁰nalarassi sikamma pammakkannu siagang gandung, kammayatompa je'ne' anggoro'nu lallumpa-lumpai sa'genna tagannakkamo tampa' pammolikannu.

¹¹ Punna Naajarakko Batara na', tarimai anjo kammaya a'jari pappakainga'; teako lussakki pa'mai'nu mae ri pangngajara'Na.

¹² Naajaraki Batara tau Nangaia, sanrapang se're mangge angngajaraki ana' nasayanga.

¹³Maupaki tau a'jari cara'deka siagang anggappaya pangngassengang.

¹⁴Lompoangngangi passawallanna kala passawallang pera' nagappaya, siagang lompoangngangi anggaranna na bulaenga.

¹⁵Tinggiangngangi anggaranna na batu paramataya; sikontu apa-apa nukacinnaiya takkulleai napasangkammai.

¹⁶Kacara'dekanga nasareko umuru' la'bu, kakalumanynyangngang siagang kala'birang.

¹⁷Kacara'dekanga napakasannangi tallasa'nu siagang napa'jariko salewangang.

¹⁸Tau manna'gala' jarreka ri kacara'dekanga lanakasiaki katallassang sitojennaya siagang mate'nea.

¹⁹Lanri kacara'dekang, naNapa'jari Batara buttaya; lanri akkala' baji'Na naNaka'rang langika ri sikamma tampa'Na.

²⁰Lanri pangngassenganNa naNapare' sikamma kabattuanna je'neka irawa ri reppe'na buttaya nampa napalo'loro' je'ne'na kammayatompa rammanga ri langi' appatiri' je'ne' ri buttaya.

²¹Lanri kammana anjo, anna'galakko mae ri kacara'dekanga siagang mae ri tangara' bajika, na'! Tea sikaliko lappassangi,

²²nalanikatutui tallasa'nu, baji' siagang appakasannang.

²³La'jappako siagang amang, siagang tena nulatatto'ro.

²⁴Lamangeko attinro tamallaka pakkasia'nu, siagang labajiki tinronu sila'busu' bangngi.

²⁵Tena nuparallu malla' ri bala ti'ring battua sanrapang anging lompo, antujui tau ja'dalaka.

²⁶LaNajagaiko Batara. Tena nalaNabalang parekangko tu'guru' antama' ri sikko' nitannanga.

²⁷Punna nia' pakkullenu untu' anggaukangi bajika mae ri tau parallua ri kabajikannu, teako tollaki untu' anggaukangi anjo kammaya.

²⁸Teako suroi parannu tau attayang sa'genna ammuko, punna akkulle memanja anjo wattua nutulung.

²⁹Teako rancanai apa-apa lappakarugia mae ri parannu tau ia niaka ri ampi'nu siagang tappaka mae ri kau.

³⁰Teako a'besereki siagang tau maraenga, tenaya nale'ba' a'gau' ja'dala' mae ri kau.

³¹Teako angngiri matai mae ri tau ma'gau' katerassanga, siagang teako turuki gau'-gau'na ke'nanga.

³²Saba', anjo Batara Nakabirisi tau a'gau' ja'dalaka, mingka agang jarreki siagang tau lambusuka lalang tallasa'na.

³³Natunrai Batara balla'na tau ja'dalaka, mingka Nabarakkaki balla'na tau mannurukia mae ri Ia.

³⁴ Nakabirisi Batara tau tinggi langgaya, mingka Nabarakkaki tau tuna pa'maika.

³⁵Tau cara'deka pila' mabauki arenna, mingka tau toloa pila' nicallai.