Read Makassar Version – KITTA' MATANGKASA PANGNGEBARANG 30 Bible Online

PANGNGEBARANG 30 - Makassar Version – KITTA' MATANGKASA bible

PANGNGEBARANG 30

¹Iaminne kana-kana napaua Agur, ana'na Yake, battu ri Masa: “Posoa', o, Allata'ala, posoa'! Cappu'mi kagassingangku!

²Toloa' sanrapang olo'-olo'; tena pammahangku.

³Tena kule'ba' appilajara' kacara'dekang manna sike'de' tania' kuasseng ri passala'na Allata'ala.

⁴Tau kereanga le'ba' nai' naung ri suruga? Le'bakika angngangkang anging lalang limanna, siagang anroko' je'ne' lalang ri bajunna, yareka ampattantui pa'baeng-baenna linoa? Inaika anjo taua, siagang inai ana'na? Mattantu nuassengi!

⁵Narupai janjinNa Allata'ala. Sanrapangi pa'lapa' batangkale mae ri sikontu tau battua a'la'lang mae ri Ia.

⁶Punna nutambai apa napaua, lanapasaileko siagang lanapa'nyatai angkana ikau paballe-balleko.”

⁷“O, Allata'ala, kupalaki ri tenanapa kumate, Kisarea' rua passalaka anne.

⁸Tena lalo kupaui kana-kana jekkonga siagang a'balle-ballea, siagang teaKi' lappassangia' a'jari kasi-asi yareka akkalumanynyang. Kisarea' apa kuparalluanga bawang.

⁹Saba', punna kalumanynyanga', gassingka kukana sallang angkana tenamo kuparalluangKi'. Na punna kasi-asia', gassingka a'lukkaka' sa'genna kura'massi arenTa.”

¹⁰Teako pitinai se'rea ata mae ri karaenna, gassingka nasumpako siagang nabilang salako.

¹¹Nia' tau assumpai manggena siagang tena napakalompoi amma'na.

¹²Nia' tau nakanai kalenna tangkasa' na sitojenna sanna' rantasa'na.

¹³Nia' tau nakanai kalenna baji' sikali, teai sipato' baji'na!

¹⁴Nia' tau amboyai dalle'na sanna' palla'na batena; sanna' sekke'na siagang napaccoki tu kasi-asia siagang tau lammaya.

¹⁵Papaccoka rua ana'na; rua-rua niarengi “Untu' inakke!” Nia' appa' passala' tena sanggana:

¹⁶linona tau matea, baine tenaya nale'ba' allassukang, butta kalotoro' turerea ri bosi, na pepe' a'lepaka mange-mange.

¹⁷Tau ancau-cauwai manggena yareka amma'na toayamo, siratangi nipasambila assulu' sollanna nitotto' matanna ri jangang-jangang kalaa' siagang nikanre maya'na ri balangkoa'.

¹⁸Nia' appa' passala' sukkara' sikali kupahang:

¹⁹balangkoa' anri'baka ri allaka, ulara' a'loloka ri batu karanga, kappala' assombalaka ri tangnga tamparanga, na sipasang ana' rungka a'bayu'-bayuanga.

²⁰Iaminne akkala'na se'rea baine a'bali' ballanga ri bura'nenna: Le'ba'na a'gau' sala, angnganremi nampa nalu'lu' bawana, nampa nakana, “Tena apa-apa kugaukang!”

²¹Nia' appa' passala' sukkara' nitarima ri sikontu linoa:

²²se'rea ata a'jari karaeng, tutolo anggappai sikontu apa nakaerokia,

²³baine akkullea a'nikka na taningaia ri taua, ata baine angngalleangi empoanna karaeng bainena.

²⁴Ri linoa anne nia' appa' rupanna olo'-olo' ca'di mingka sanna' cara'de'na, iamintu:

²⁵Kaluara, olo'-olo' lamma, mingka napasadiai kanrena ri timoro'na.

²⁶Palandu', olo'-olo' lamma mingka napareki balla'na ri bulu' batua.

²⁷Katimbang, olo'-olo' tena karaenna, mingka ta'atoroki barisanna.

²⁸Cacca', olo'-olo' akkullea nijakkala' siagang lima, mingka niaki ri balla' lompona karaenga.

²⁹Nia' appa' passala' appakalannasaki punna niparhatikangi batena a'jappa, iamintu:

³⁰Singa, olo'-olo' kaminang kassaka ri sikontu olo'-oloka siagang tenaya namalla' manna ri apa-apa mamo;

³¹bembe laki, jangang laki ammenteng kassaka a'jappa, na karaenga ri dallekanna ra'ya'na.

³²Punna lanri kadongokannu na nutampo anrancanakangi apa-apa ja'dalaka, tutuko!

³³Saba', punna appasileokko dadi', langgappako mantega. Punna nutunrung ka'murunna taua, assuluki cera'na. Punna appaumbako kalarroang, antamakko lalang ri pa'beseranga.