Read Makassar Version – KITTA' MATANGKASA PANGNGEBARANG 4 Bible Online

PANGNGEBARANG 4 - Makassar Version – KITTA' MATANGKASA bible

PANGNGEBARANG 4

¹He ana'-anaka, pilangngeri laloi pappakainga'na manggenu. Parhatikangi anjo, nanula'jari tau cara'de'.

²Anne apa kupangngajarranga mae ri kau bajiki, jari teako bawang-bawangngangi.

³Ri wattungku ca'di ija, ana' sitau-tauna tau toaku,

⁴naajaraka' manggeku. Nakana ri nakke, “U'rangi sikamma pappakaingakku, tea' laloko kaluppai. Gaukangi pitunju'-pitunjukku, sollanna mate'ne tallasa'nu.

⁵A'jariko tau cara'de siagang tau tarang pikkirannu! Tuli u'rangi sikamma pappakaingakku siagang teako pelakki.”

⁶Pakala'biriki kacara'dekanga, nanijagaiko ri kacara'dekanga; mangngaiko ri ia natuli lanajagaiko sollannu tuli amang.

⁷Kaminang parallua musti uru nugaukang iamintu usahako a'jari cara'de'. Manna apa nuondang, mingka uru-urua iamintu usahako anggappa pangngassengang.

⁸Pakalompoi kacara'dekanga, nanupakatinggi. Raka' majarreki, nalanapabattuangko kala'birang.

⁹Lanasareko belo-belo bunga ga'ga, untu' a'jari songko' kalompoannu.

¹⁰Pilangngeria' na'! Parhatikangi baji'-baji' sikamma pappakaingakku, nala'bu umuru'nu.

¹¹Le'ba'mi kupangngajarrang kacara'dekanga mae ri kau siagang kupicinikiangko antekamma batena nikanaya tallasa' annabaya.

¹²Punna kamma anjo tallasa'nu, tenamo nulanggappa salibanra ri wattu a'jappanu, siagang tenamo nulatatto'ro ri wattunnu lari.

¹³Tuli u'rangi ajarang le'baka nutarima battu ri nakke. Jagai anjo baji'-baji', saba' lanri anjo pangngajaraka nalangngerang wassele' tallasa'nu.

¹⁴Teako turuki batena attallasa' tau ja'dalaka, siagang teako palembai panggaukanna ke'nanga.

¹⁵Teako parhatikangi ke'nanga. Pakabellai kalennu battu ri ke'nanga, siagang a'jappa tulusu' mako ikau.

¹⁶Tau ja'dalaka takkulleai attinro punna tenapa nagaukangi apa tenaya nabaji'. Tata'do'dokai ke'nanga punna tenapa nabalai paranna tau.

¹⁷Kaja'dallang siagang kapallakkanga, iami a'jari sanrapang kanrena siagang inunganna ke'nanga.

¹⁸Oloanna tau ja'dalaka sassangi sangkamma sassanna bangngia. Tatto'roi siagang tu'guruki ke'nanga natanaassenga kalenna. Mingka, oloanna naoloa tau bajika sanrapangi pammumbana alloa, pila' sallo pila' singaraki, sa'genna kala'busanna a'jari singara' sikali.

²⁰Parhatikangi kana-kanangku, na'! Pilangngeri sikamma pappakaingakku.

²¹Teako pelakki, passangalinna tuli boliki ri pa'mai'nu.

²²Tau ampahangai la'jari sehaki lalang tallasa'na.

²³Katutui bajiki atinnu, nasaba' atinnu ampattantui oloang tallasa'nu.

²⁴Tea' laloko appasuluki kana-kana tenaya natojeng. Teako pa'dongo'-dongoki siagang pakabellai kana-kana balle-ballea untu' ampa'dongo'-dongoki parannu tau.

²⁵Parallui accaya rupannu lalang kalambusang pa'mai'nu; tena nuparallu a'gau' lanri nia'na ero' taccokkonu.

²⁶ Pikkiri' baji'-bajiki rolong nampa ampanggaukangko, nalangngerang wassele' sikontu usahanu.

²⁷Pakabellai kalennu battu ri kaja'dallanga, siagang lambusukko lalang tallasa'nu. Tea' laloko ammengkai battu ri oloang annabaya.