Read Makassar Version – KITTA' MATANGKASA PANGNGEBARANG 5 Bible Online

PANGNGEBARANG 5 - Makassar Version – KITTA' MATANGKASA bible

PANGNGEBARANG 5

¹Pilangngeria', na'! Parhatikangi kacara'dekangku siagang pangngassengangku kupangngajarranga mae ri kau,

²sollanna nuasseng ampa'rampei kalennu siagang a'bicara sangkamma tau niaka pangngassenganna.

³Anjo baine salaya, sanrapangi je'ne' bani bawana, kana-kananna angngallei pa'mai',

⁴mingka punna allalo ngasemmo apa le'baka, paika mami siagang pa'risika mami ammantang tassesa.

⁵Nare'resangko naung ri linona tau matea; oloang naoloa iamintu oloang lamange ri kamateanga.

⁶Tena natuli ammantang ri oloang lamangea ri katallassanga; tanaassenga kalenna nammengkamo battu ri anjo oloanga.

⁷Lanri kammana anjo, ana'-anaka, pilangngeri laloi kana-kanangku siagang teako balang parekangi.

⁸Pakabellai kalennu battu ri baine sala kammaya anjo. Ba'lalo teako a'reppesi ri balla'na.

⁹Punna assileporangko siagang baine kammaya anjo, latappela'mi kala'birannu, siagang nyawanu laniallemi ri wattu rungkanu ri tau tangngassenga mangngamaseang.

¹⁰Kakalumanynyangannu lala'busuki nikanre ri tau maraeng, siagang wassele' karesoannu la'jari napatangi tau tenaya nanuassengi.

¹¹Kale'bakkanna lakkunrareng mako, punna cappu'mo batangkalennu nikanre ri garring.

¹²Nampa lanukana, “Ah, angngapa nakubirisi' ri pappakaingaka? Angngapa kutaeroka nipasaile?

¹³Taeroka' ampilangngeri guru-gurungku siagang taeroka' anturuki ke'nanga.

¹⁴Takuassenga kalengku nakutu'guru'mo ri dallekang matanna tau jaia.”

¹⁵Lanri kammana anjo, teako amminrai pa'mai'nu mae ri bainennu siagang mangngaiko mae ri ia bawang.

¹⁶Tena matu-matunnu a'boya kanyamangngang mae ri baine teai bainennu.

¹⁷Anjo kanyamangnganga poro untu' ikau bawang siagang bainennu, teai untu' siagang tau maraenga.

¹⁸Lanri kammana anjo, paralluko mate'ne siagang baine kalennu; boyai kanyamangnganga siagang tulolo le'baka nunikkai,

¹⁹iamintu tulolo sannaka ga'gana siagang laccirika sanrapang kijang. Boli'mi kamma kaga'gang tubuna tuli ampongoriko siagang nabengoko pangngainna.

²⁰Apa matu-matunna taua cinna mae ri baine maraenga, ana'? Untu' apa nanusikatinroang siagang baine salaya?

²¹Naciniki Batara sikontu apa-apa nagaukanga rupataua. Manna kemae lampana rupataua, tuli nijannangngi ri Batara.

²²Anjo dosana tau ja'dalaka sanrapangi sikko' tattannanga untu' kalenna tonji ke'nanga.

²³Matei lanri tenana naero' annarima pappakainga'. Katoloanna angngerangi mae ri kaancuranga.