Read Makassar Version – KITTA' MATANGKASA PANGNGEBARANG 6 Bible Online

PANGNGEBARANG 6 - Makassar Version – KITTA' MATANGKASA bible

PANGNGEBARANG 6

¹Ana', le'bakko kapang a'janji untu' antanggongi inranna se'rea tau.

²Siagang le'ba' tongko kapang kasikkokang ri kana-kanannu siagang nialle sikko' ri janji kalennu tonji.

³Punna kammatojeng na', nia' mako lalang ri kakoasanna anjo taua. Mingka kamma anne batenu nukkulle ta'lappasa': a'lampako linta' mae ri anjo taua; pala' dudumi sollanna naero' ampata'lappasakko.

⁴Teako a'lampai rolong tinro, siagang teako ammari-mari posoi.

⁵Lappassangi kalennu battu ri anjo sikkoka sanrapang jangang-jangang yareka kijang ta'lappasaka battu ri tau ammuranga.

⁶Tau malasaka parallui naparhatikang antekamma batena attallasa' kaluaraya siagang appilajara' battu ri ia.

⁷Anjo kaluaraya tena pamimpinna, tena todong pamarentana yareka tukkajannanna,

⁸mingka lalang wattu pakkattoang appasse'rei ke'nanga bokong untu' wattu kacipurang.

⁹Sa'genna siapa sallona anjo tau malasaka latinro? Angngapapi nambangung?

¹⁰ Ammantangngi a'raka' lima untu' ammari-mari, siagang nakana, “Ah, lattinroa' sinampe' dudu, ta'do'doka'.”

¹¹Mingka lalang attinrona, nitujumi ri kakurangang siagang kakasi-asiang, battua sanrapang paella' angngerang sanjata.

¹²Tau ja'dalaka siagang tau kurangajaraka a'la'bangi a'balle-balle.

¹³Akkarena matai siagang appareki pammatei untu' annipu.

¹⁴Pikkirang botto'na rassi siagang rancana ja'dala' siagang appaumba pa'beserang ri kere-keremae.

¹⁵Yangasenna anjo la'jari passabakkang nanituju kalenna ri bala ti'ring battua, nampa ancuru' taba sikali.

¹⁶Nia' tuju passala' Nakabirisi Batara siagang tena nalaNabalang parekangi, iamintu: Sipa' borroa, bawa a'balle-balle, lima nangaia ammuno tau tena salanna, pikkirang a'rancanaya apa-apa ja'dala', bangkeng akkaro-karoa mange ri kaja'dallanga, sa'bi tulusu' a'balle-ballea, siagang tau appa'niaka passimusuang mae ri aganna.

²⁰Ana', gaukang laloi apa napassuroanga manggenu, siagang teako kaluppai sikamma pappakainga'na amma'nu.

²¹Tuli u'rangi kana-kananna ke'nanga siagang boliki anjo ri pa'mai'nu.

²²Ajarang-ajaranna ke'nanga langnguluko lalang pa'jappannu, anjagaiko ri wattu bangngi, siagang assareko pitunju' ri wattu ambangunnu.

²³Anjo pitunju'-pitunju'na tau toanu sanrapangi lampu singaraka; pappasailena ke'nanga napicinikiangko antekamma nikanaya tallasa' baji'.

²⁴Lanri kammana nipakabella mako battu ri sikamma baine salaya, siagang battu ri panynyonyo'-panynyonyo' a'racunga battu ri bainenna tau maraenga.

²⁵Teako erokki nigoda ri kaga'ganna ke'nanga, teako takkontakki mae ri mata manynyonyo'na ke'nanga.

²⁶Anjo baine salaya akkullei nisewa sanrapang kanre sipannea anggaranna, mingka nikanaya a'gau' sala siagang bainenna tau maraenga musti nibayaraki siagang nyawa.

²⁷Maka akkullekai taua anriwa pepe' natanikanrea ri pepe' bajunna?

²⁸Maka akkullekai taua angngonjo' bara pepe' natanikanrea bangkenna ri pepe'?

²⁹Anjo sangkammai bahayana siagang assikatinroanga siagang bainenna tau maraenga. Inai-nai anggaukangi takkulleai ta'lappasa' battu ri hukkunganga.

³⁰Punna a'lukka' taua kanre, manna pole lanri cipuru'na, lanihinai.

³¹Siagang punna nijakkalaki, musti nabayaraki ammotere' a'lappi tuju; untu' anjo musti tappela' ngasengi sikontu barang-baranna.

³²Mingka antekammai tu bura'ne a'gau' salaya? Ia napanraki kalenna! Ia sanna' sikali dongo'na!

³³Lanisessai siagang lanipare' caritai. La'jari bottoki arenna satunggu-tungguna.

³⁴Saba' lanri anjo panggaukanna nalakkimburu bura'nenna anjo bainea, sa'genna allumpa-lumpa tojeng kanassuanna. Na punna eroki a'boya pa'balassang, tena sikali nalamangngamaseang.

³⁵Takkulleai ninyonyo' siagang doe'; manna siapa jaina hadia nisareangi talakkullei ampanaungi larrona.