Read Makassar Version – KITTA' MATANGKASA PANGNGEBARANG 7 Bible Online

PANGNGEBARANG 7 - Makassar Version – KITTA' MATANGKASA bible

PANGNGEBARANG 7

¹U'rangi laloi kana-kanangku, ana', siagang teako kaluppai apa kuparentakanga mae ri kau.

²Turuki sikamma pappakaingakku sollanna numate'ne ri tallasa'nu. Pinawangi ajarang-ajarang bajikku sanrapang nukatutuinna lisere' mata kalennu.

³Tuli u'rangi anjo ajarang-ajarangku, siagang boliki lalang ri ati mailalannu.

⁴Rapangi anjo kacara'dekanga sari'battannu siagang anjo pangngassenganga bela baji'nu.

⁵Kacara'dekanga lanapakabellako battu ri baine salaya, baine anggodayako siagang kana-kana te'ne dudu.

⁶Ri se'reang allo accinikka' battu ri tontongang ballakku.

⁷Nampa jai kucini' tau rungka tenayapa apa-apa naasseng; mingka ia kaminang kuparhatikang ri ke'nanga, iamintu nia' sitau dongoka ri alla'na ke'nanga.

⁸Ri karuenna alloa, ri appakkaramulanamo sassanga, a'jappa-jappami anjo lapung tau rungka ri ampi'na pa'bilukanga, ri oloang mangea ri tampa' pammantanganna se'rea baine.

¹⁰Anjo bainea tena nasannang nyawana ammantang ri balla'na. Sinampe'-sinampe' nia'mi sedeng ri biring aganga, nampa mange ri paranga, yareka ammenteng attayang ri panyingkulu' aganga. Gau'-gau'na tena sikali malla'na siagang tangngassengai siri'-siri'. Kuciniki assulu' ammakeang sangkamma baine sala, nampa namangei anjo lapung tau rungka sumpadeng siagang akkala' salana.

¹³Narakaki anjo tau rungkaya nampa nabau. Tasiri'-sirikai angkana ri ia,

¹⁴“Anne alloa musti kubayaraki tinjakku, nalanri kammana le'ba'ma' assare koro'bang.

¹⁵Lanri kammanami anjo nakussulu'mo untu' amboyako, sollannu ero' mange angnganre ri ballakku. Kamma-kamma anne kubuntulu' mako!

¹⁶Le'ba'mi kulaparri katinroangku siagang seperei sangka' rupaya cura'na battu ri Mesir,

¹⁷siagang le'ba'mi kusarei minynya'-minynya' bau' muru', candana, siagang kayu te'ne.

¹⁸Kamma-kamma anne, umbamo nisikama'-kamaseang siagang nanikasia' passingainta sila'busu' bangngi.

¹⁹Tenaji bura'nengku ri balla', sitabangi lalang pa'lampang bella.

²⁰Angngerangi jai doe', siagang talammoterai lalanna rua daminggu.”

²¹Kammaminjo batena anjo bainea angngodoki anjo tau rungkaya siagang kana-kana panynyonyo' angngontaka, sa'genna nigodamo anjo lapung tau rungka.

²²Tappikkirami nanapinawammo anjo bainea sanrapang sapi nirenrenga mange ri pammolonganga siagang sanrapanga tunitahang nieranga a'lampa untu' antarimai hukkungang nipasadiaya untu' tau toloa;

²³sinampe' mami nanitarrusu'mo atenna ri ana' pana. Sanrapang jangang-jangang anri'baka mange ri sikkoka, kammaminjo sanrapanna anjo turungkaya tanaassengai kalenna angkanaya a'reppeseki ri balaya nyawana.

²⁴Lanri kammana anjo, ana'-anaka, pilangngeria'. Parhatikangi sikamma pappakaingakku.

²⁵Teako lappassangngi baine kammaya anjo anggodai pa'mai'nu; teako a'lampai amboyai,

²⁶saba' jaimi bura'ne naancuru' katallassanna. Tanila'busami nirekeng angkana siapami jaina ancuru' lanri ia.

²⁷Punna a'lampa taua mae ri balla'na, sangkammami angkana angngallea oloang pammolongang mange ri kamateanga.