Read Makassar Version – KITTA' MATANGKASA PANGNGEBARANG 8 Bible Online

PANGNGEBARANG 8 - Makassar Version – KITTA' MATANGKASA bible

PANGNGEBARANG 8

¹ Pilangngeri! Akkio'-kioki kacara'dekanga, assa'rai pangngassenganga.

²Ammentengi ri bulu'-buluka ri biring aganga, siagang ri sikamma panyingkulu'na aganga.

³Ri pakke'bu' lompoa, ri oloang antamaka ri kotaya, anjorengi kalangngerang sa'ranna, angkana,

⁴“He, umma' rupataua, makkioka' mae ri kau; tunggala' rupatau ri lino, parhatikangi anne pakkiokku!

⁵Ikau tenayapa pangalamannu, appilajarakko ampatangi pikkirang taranga; ikau toloa, appilajarakko a'jari insa'.

⁶Parhatikangi kana-kanangku, lanri annabana ngaseng siagang baji'na matu-matunna.

⁷Apa kupaua, annaba ngasengi, saba' kukabirisi balle-ballea.

⁸Kana-kanangku lambusu' ngasengi, manna se're tania' a'jekko yareka sala.

⁹Untu' tau cara'deka, annabai kanangku, untu' mangngassenga, coco' sikali kanangku.

¹⁰Anggaraki pappakaingakku la'biangngang na pera' ti'noka paralluangngangi pangngassenganga la'biangngang na bulaeng ti'noka.

¹¹Inakkemi kacara'dekang, la'biangngang anggaranna na barliang; takkulleai nipasanrapang siagang sikontu apa nukacinnaia.

¹²Inakkemi kacara'dekang; ri nakke nia' pammahang; kacara'dekang siagang pangngassengang.

¹³Punna nipakala'biri' Batara, battuanna nikabirisi kaja'dallanga; takungaiyai kaborroanga siagang katampoanga. Kukabirisi gau'-gau' ja'dalaka siagang kana-kana annipua.

¹⁴Inakkemi assare pikkirang. Na inakke todong ampa'rupai. Inakke cara'de' na kugassing todong pole.

¹⁵Sikamma karaenga kubantui anggaukangi pamarentahanga, sikamma tukoasaya kutulungi ampaentengi kaadelanga.

¹⁶Lanri jasaku, sikamma tumalompoa siagang bija karaenga ammarenta siagang napajappa kaadelanga.

¹⁷Kukamaseangi tau mangngaia mae ri nakke; inai amboya', lanabuntulukka'.

¹⁸Ri nakke sadiai pakkalumanynyangnganga kammayatompa kalompoanga siagang kacopponganga.

¹⁹Apa nugappaya battu ri nakke la'biangngangi na bulaeng ti'noka; la'bi lompoangngangi anggaranna na pera' ti'noka.

²⁰Amminawanga' ri oloang kaadelanga, a'dakka' ri agang kalambusanga.

²¹Inai tau angkamaseanga', kupa'jari kalumanynyangi; kupirassi balla'na siagang barang-barang.

²² Inakke Napa'jari Batara a'jari uru-urua, inakkemi bate pare'Na ri pakkaramulaya ri jammang riolo dudu.

²³Nipa'jaria' battu ri pakaramulanna jammanga, ri pakaramulanna, ri tenanapa nipa'jari buttaya.

²⁴Lassu' memamma' ri tenanapa nipa'jari tamparang lompoa, ri tenanapa nammumba sikamma kabattuanna je'neka.

²⁵Inakke lassu' memamma' ri tenanapa nipaentengi sikamma monconga, ri tenanapa nibangungi sikamma bulu'-buluka,

²⁶ri tenanapa Napa'jari Batara buttaya siagang sikamma paranna, ba'lalo ri tenanapa Napa'jari kangkanna butta uru-urua.

²⁷Kusa'bi ri wattunna Napaka'rang langika, siagang ri wattunna Napabantang passimbanga rateanna tamparanga,

²⁸ri wattunna Naboli' Batara rammanga rate ri allaka, siagang Nasungke sikamma kabattuanna tamparang lompoa,

²⁹ri wattunna Naparenta je'ne' tamparanga sollanna tena nalaloi pa'baeng-baenna. Inakke nia' tonga' hadere' anjoreng ri wattunna Napadongko' pa'lapa'na buttaya.

³⁰Niaka' ri sa'rinNa a'jari ana' nisayanNa, tunggala' allo inakke kate'neanNa; tuli niakka' akkarek-karena ri dallekanNa.

³¹Assannang-sannanga' ri tompo' buttaNa, na mate'ne pakkasiakku ri alla'na rupataua.

³²Lanri kammana anjo, pilangngeria', he tau rungkaya! Turuki pitunjukku, nulamate'ne.

³³Tarimami pappakaingakku siagang a'jari mako cara'de', teako bawang-bawangngangi.

³⁴Mate'nei tau mappilangngeria ri nakke tunggala' alloa ammempo antayanga' ri pakke'bu' ballakku, tuli a'jaga-jagaya ri pakke'bu' lompona pammantangangku.

³⁵Inai ambuntulukka', anggappai katallassang, mangngellai Batara mae ri ia.

³⁶Inai tena nabuntulukka', napakarugi kalenna; tau birisika ri nakke, natanringi kamateanga.”