Read Makassar Version – KITTA' MATANGKASA PANGNGEBARANG 9 Bible Online

PANGNGEBARANG 9 - Makassar Version – KITTA' MATANGKASA bible

PANGNGEBARANG 9

¹Kacara'dekanga ambangummi balla', siagang napaenteng tujua bentenna.

²Ammolommi olo'-olo' niparakai untu' assua'-suara', appare' je'ne' anggoro' siagang appasadia kanre nipatala.

³Sikamma palayang bainea nasuroi a'lampa untu' akkiok-kio' battu ri tampa'-tampa' tinggia ri kotaya angkana,

⁴“Inai-nai tena pangalamanna, mae mako anrinni!” Mae ri tau tenaya akkala' baji'na, nakana kacara'dekanga,

⁵“Umba nanipinyamangngi kanreku siagang nukasia' anggoro' kupareka.

⁶Bokoi kadongokanga, sollannu attallasa' mate'ne. Pinawangi oloanna tau cara'deka.”

⁷Punna tau taeroka niajara' nupicinikiang kasalanna, lanakakkaliko. Punna nukalarroi tau ja'dalaka, lanapakka'-pakkanaiko.

⁸Teako callai tau taeroka niajara', saba' lanakabirisiko. Mingka punna tau cara'de' nupicinikiang kasalanna, lanapakala'birikko.

⁹Punna tau cara'de' nupakainga, pila' la'jari katambangi cara'de'na. Siagang punna tau mannuruki ri Allata'ala nuajara', pila' lakatambangi pangngassenganna.

¹⁰ Untu' a'jari cara'de' uru-urua parallu niparhatikang iamintu parallui taua mappakala'biri' siagang malla' mae ri Batara. Punna nuassengi Kaminang Matangkasaka, langgappako pammahang.

¹¹Kacara'dekanga lanasareko la'bu umuru'.

¹²Punna kacara'dekang nupatang, ikau kalennu laupa'. Mingka punna nusorongboko kacara'dekanga, ikau tonji pole napakarugi.

¹³Anjo kadongokanga sangkammai baine pote tenaya pangalamanna siagang tena nangngasseng siri'.

¹⁴Tampa'na iamintu pakke'bu' balla'na yareka pakke'bu' lompona kotaya.

¹⁵Battu anjorengi akkio' mae ri tau numaloa. Tau lambusu' pa'maika nanyonyoki nakana,

¹⁶“Umba assengkako, he ikau ngaseng tau tenayapa pangalamannu!” Nampa mae ri tau tenaya akkala' baji'na nakana,

¹⁷“Je'ne' nilukkaka te'nei kasia'na, siagang kanre nikanre cokko-cokkoa nyamangangngangi kasia'na.”

¹⁸Anjo tau nagappaya tanaassengai kalenna angkana tau battua ri anjo bainea lanarapi'mi a'jala'na anjoreng; siagang inai-nai antama'mo ri balla'na, sangkammami angkana antamaki ri linona tau matea.