Read Makassar Version – KITTA' MATANGKASA KATO'BA 1 Bible Online

KATO'BA 1 - Makassar Version – KITTA' MATANGKASA bible

KATO'BA 1

¹Kana-kana niaka lalang ri anne kittaka, assala'na iamintu battu ri se'rea Tau Assarea Pangngajarang, ana' bura'nena Daud, ansambeangai Daud a'jari karaeng ri Yerusalem.

²Nakana anjo lapung Tau Assarea Pangngajarang: Yangasenna poro sia-sia siagang tena matu-matunna! Tena bua'-bua'na anjo tallasaka, tena ngaseng anggaranna.

³Anjamaya tojengki' lalang tallasatta, ammatti'-matti' songotta. Mingka, apa nigappa akkullea nikalompoang pa'mai'?

⁴Ammumbai sossorang se'rea na lanynya' sossorang maraenga, mingka linoa tuli kammana.

⁵Alloa tuli ammumbana siagang tuli labuna. Posomi ammotere' mange ri tampa'na riolo, nampa ammumba poleang.

⁶Anging ammiri' a'lampa timboro', nampa ammiri' a'lampa wara'; amminro-minroi, nampa ammotere' pole.

⁷Yangaseng binangaya a'lo'loroki mange ri tamparang, mingka tena rassina tamparanga. Ammotereki je'ne'na mange ri ulunna binangaya, nampa a'lo'loro' pole.

⁸Yangasenna appakalanre, siagang appakalanre tena anjorenganna. Tena bassoro'na matanta accini'; tena sukku'na tolinta allangngere'.

⁹Apa le'baka kajariang, lakajariang poleangi. Apa le'baka nigaukang, lanigaukangi pole. Tena apa-apa akkulle nikana beru ri anne linoa.

¹⁰Nia' tau nakana, ‘Ciniki, anne anu beru!’ Mingka, anjo anu nia' memammo ri tenanapa nilassukangki'.

¹¹Talanau'rangiai taua apa kajarianga ri rewasa' allaloa. Kamma tomminjo kajariang ri kamma-kammaya anne siagang lakajarianga sallang, tena nalaniu'rangi ri tau labattua sallang.

¹²Inakke, Tau Assarea Pangngajarang, ammarenta' a'jari karaeng ri Yerusalem mae ri tu Israel.

¹³Attojeng-tojenga' ero' ansalidiki siagang ampappilajari siagang baji' sikontu apa kajarianga ri anne linoa. Sare le'baka Napasadia Allata'ala untu' ikatte teai sipato' appakasi'nana pa'mai'.

¹⁴Kucini' ngasemmi sikontu panggaukanna taua ri anne linoa. Patappa'mi, angkanaya yangasenna anjo sia-siaji, sanrapang tau angngondanga anging.

¹⁵Apa a'jekkoa takkulleai nilambusi, na apa tenaya takkulleai nirekeng.

¹⁶ Kupikkiriki angkana, “Inakke anne a'jari tau niparalluanga' siagang tau cara'deka'; bella cara'dekku na sikontu tau le'baka ammarenta ri Yerusalem rioloangangku. Appasse'rea' jai pangngassengang siagang kacara'dekang.”

¹⁷Jari attojeng-tojemma' ero' angngassengi passisalanna nikanaya pangngassengang siagang kadongokang, nikanaya kacara'dekang siagang katoloang. Mingka a'nassami angkanaya inakke anne sanrapanga' poro tau angngondanga anging.

¹⁸Nasaba' pila' jai kacara'dekanta, pila' jai tongi kasusanta.