Read Makassar Version – KITTA' MATANGKASA KATO'BA 10 Bible Online

KATO'BA 10 - Makassar Version – KITTA' MATANGKASA bible

KATO'BA 10

¹Katingalo matea sikayu nabottoki minynya' bauka sibotolo', sike'de' katoloang ampelaki kacara'dekang tinggi dudua.

²Siratangi punna tau cara'deka anggaukangi kabajikanga, siagang tau toloa anggaukangi kaja'dallanga.

³Katoloanna niciniki ri gio'-gio'na. Siagang napappicinikangi mae ri yangaseng taua kadongokanna.

⁴Punna nikalarroiko ri tukoasaya, teako palaki ammari anjama. Manna lompo kasalannu, nipammopporangko punna sannangko siagang sa'barakko.

⁵Nia' pole kaja'dallang maraeng kucini' ri lino, iamintu kajekkoanna tukoasaya.

⁶Tau dongoka nisarei empoang mala'biri', na pamimpinga tanggappaya apa-apa.

⁷Le'baki kucini' ata-ataya a'dongko' jarang nampa bija karaenga a'jappa bangkeng sangkamma ata.

⁸ Inai angngeke kali'bong, kalenna latu'guru' antama; inai anrumbang tembo' lanitottoki ri ulara' a'racung.

⁹Inai anjama ri kali'bong batua, lata'runtuki na bokka'. Inai ammisa' kayu, akkullei anggappa loko'.

¹⁰Punna pokkolo' berannu natena nukantisiki, la'bi lasusako ampakei anjama-jama. Pakei akkala' baji'nu, siagang apparekko rancana la'bi riolo.

¹¹Punna angngokko' riolo ularaka ri tenanapa nipannabai ri tau cara'deka, anjo sanrona tenamo matu-matunna.

¹²Lanri kana-kananna tau cara'deka nanipakalompoi mingka panraki tau toloa lanri kana-kananna tonji.

¹³Appakkaramulai a'bicara kosong biasa, mingka kale'bakkanna a'bicara kammami tau pongoro'.

¹⁴Memang, tau toloa jai bicaranna. Allo labattua kacokkoangi mae ri katte ngaseng. Tena akkulle antappui apa lakajarianga punna tena maki'.

¹⁵Tau toloaji bawang tangngassengai oloanga mange ri balla'na, anjama terasaki na tammari-maria.

¹⁶Cilakami pa'rasangang rungka dudua karaenna, siagang assua'-suaraka tumalompona sipattang bujuru'.

¹⁷Upaki pa'rasangang nikangalikanga karaenna, tumalompona nampai angnganre punna narapi' wattunna, tenaya napainung siagang akkullea ampakalewai kalenna.

¹⁸Lakabosiangi pattongko'na ballaka punna tena nipakabajiki, na kale'bakkanna jappo'mi anjo ballaka lanri kamalassang.

¹⁹Passua'-suarranga angngerangi kakkala', na anggoroka appakarannu. Mingka parallui nia' doe' untu' pa'bayara'na.

²⁰Teako callai karaenga, manna pole lalang pa'mai'. Teako pakkanai tu kalumanynyanga, manna ri katinroang kalennu. Akkullei nalangngere' jangang-jangang apa nupaua, nampa napabattu mae ri anjo tau natujua.