Read Makassar Version – KITTA' MATANGKASA KATO'BA 11 Bible Online

KATO'BA 11 - Makassar Version – KITTA' MATANGKASA bible

KATO'BA 11

¹Pantamaki doe' modala'nu ri usaha pantarang pa'rasangang. Mattantu anggappako passawallang ri allo ri boko.

²Pantamaki modala'nu ri a'rupa-rupaya usaha; a'boyako usaha sipajai-jaina. Saba' parallui taua tutu, ri tenanapa natattuju balaya.

³Manna kemae rumbanna poko' kayua, tuli lanra'bana naung ri tampa' rumbanna. Punna angngerangi je'ne' rammanga sa'genna battala', laturung tongi bosia ri lino sanna' lompona.

⁴Inai attayang sa'genna sukku' baji'na anginga siagang wattua, tala'lamungai siagang tena todong nalanagappa wassele'na.

⁵Allata'ala ampa'jari sikontu apa-apaya, na takkullea napahang rupataua anjo Nagaukanga; kammayatompa tanapahangngai katallassang beru a'jaria lalang ri pammanakkanna se'rea amma'.

⁶Appakiorokko bine ri wattu bari'basa' siagang teako ammari ri wattu bangngina. Saba' taniassengai angkana bine kereanga baji' timbona. Nakulle todong baji' rua-ruai timbona.

⁷Singara'na alloa appakate'ne pa'mai'; tamaka sannanna punna akkulle nikasia'.

⁸Paralluko appala' sukkuru' punna katambang umuru'nu. Mingka u'rangi, manna salloko attallasa' ri lino, salloangangi wattunnu ri lino kamateanga. Jari, apapi pole laniminasai? Yangasenna tena matu-matunna siagang sia-siaji bawang.

⁹Kasia' baji'mi wattu karungkannu, he ikau tau rungkaya! Rannu mako ilalang lolonu ija. Rupaimi sikamma nakaerokia nyawanu, gaukamma sikontu naniakkanga pa'mai'nu. Mingka u'rangi, Allata'ala niaka ri suruga, langngadeli ngasengi sikontu apa nugaukanga.

¹⁰Pelaki ranggaselaya siagang susaya battu ri pa'mai'nu, saba' sinampe'ji allalo wattu rungkanu.