Read Makassar Version – KITTA' MATANGKASA KATO'BA 2 Bible Online

KATO'BA 2 - Makassar Version – KITTA' MATANGKASA bible

KATO'BA 2

¹Kutantuammi ero' ampakasannang mami kalengku, sollanna kuasseng nikanaya kate'neang. Mingka ma'nassa sia-sia tonji anjo kammaya.

²Kuassemmi angkanaya anjo kakkalaka kadongokang, na anjo kasannangnganga tena matu-matunna.

³Lanri ero' duduku a'jari tau cara'de', attojeng-tojemma' ero' assannang-sannang, iamintu angnginunga tojeng anggoro' siagang assua'-suaraka tojeng. Kukapangi angkana iami anjo cara kaminang baji' mae ri rupataua untu' angkasiaki nyamanna tallasa'na ri lino sinampeka anne.

⁴ Sikamma jama-jamang lompoa le'ba'mi kugaukang. Ambangunga' siapa jaina balla' untu' kalengku. Appareka' pa'lamung-lamungang bunga siagang koko-koko kulamungia poko' anggoro' siagang sangka' rupa poko' rappo-rappoang.

⁶Angngekea' kollang untu' a'jari je'ne' panai' mae ri anjo pa'lamung-lamunganga siagang koko-kokoa.

⁷ Jai atangku, baji' nakuballia, kammayatompa ia lassuka lalang ballakku. Olo'-olo' piaraku bella jaina na olo'-olo' piarana sikontu tau le'baka ammantang ri Yerusalem.

⁸ Appasse'rea' pera' siagang bulaeng, iamintu battua ri passarena sikamma karaeng bansa maraeng kuparentaya. Pakelong bura'ne siagang pakelong baine akkelong-kelongi untu' ampakasannangi nyawaku. Nia' baine piaraku sa'genna siapa kukaerokia.

⁹ Tojenga', inakkemi kaminang malompo ri sikamma le'baka ammantang ri Yerusalem, siagang tena anrateangngangi kacara'dekangku.

¹⁰Sikontu kukaerokia, kupassukkuki. Tale'bakai kutahang kalengku untu' angkasiaki kasannangngang manna antekammaya. Lompoi pa'maikku mae ri sikamma wassele' posoku, siagang iami anjo sawalakku.

¹¹Mingka ri boko kupilajari sikontu bate parekku, kammayatompa sikontu kaposoangku untu' ampa'le'baki anjo apa kupareka, kuassemmi angkanaya yangasenna anjo tena anggaranna. Anjo usahaku poro sia-siaji bawang, sanrapang tau angngondanga anging.

¹²Manna antekamma, apa akkullea nagaukang se'rea karaeng, iaji bawang apa le'baka nagaukang sikamma karaeng rioloangannaya. Nampa appakkaramulama' appikkiri' angkana: Apa battuanna nikanaya a'jari cara'de', yareka dongo' yareka tolo?

¹³Memang kuassengi, “La'bi bajikangngangi kacara'dekanga na katoloanga, rapang singaraka la'bi bajikangngangi na sassanga.

¹⁴Tau cara'deka akkullei nacini' oloang lanatujua; tao toloa rapang angngosalaki ri pa'jappanna.” Mingka kuasseng tongi angkanaya sangkammaji sare lanagappaya ngaseng ke'nanga.

¹⁵Jari kupikkiriki angkana, ‘Sare antujuai tau toloa lanatuju tonga'’. Jari, apa matu-matunna kacara'dekangku? Nampa kualle bodona kanaya, na kukana, anjo kacara'dekanga memang tena sikali matu-matunna.

¹⁶Tau toloa lalintaki nikaluppai, mingka manna tau cara'deka tena todong nalaniu'rangi. Pila' mange allo pila' lanipela' ngasengki' ri pangngu'rangi. Ikatte musti mate ngasengki', baji' tau cara'de' kammayatompa tau dongoka.

¹⁷Lanri kammana, anjo tallasaka tena anggaranna mae ri nakke, tena maraeng. Yangasenna sia-siaji bawang; poro angngondangkuji bawang anging.

¹⁸Sikontu wassele' jama-jamangku siagang panggappangku tena matu-matunna mae ri nakke, lanri musti kubokoi untu' tau ansambeangia'.

¹⁹Nampa inai akkulle angngassengi angkanaya cara'deki yareka toloi kalenna? Mingka manna antekamma iami lampatangi sikamma wassele' usahaku, ia kugappaya lalang tallasakku ri anne linoa, lanri akkaresoku siagang lanri kacara'dekangku. Jari, anjo sia-sia tonji.

²⁰Kamma-kamma anne assesse' lalamma' lanri akkareso duduku.

²¹Nasaba' punna akkareso dudu taua napakei sikontu kacara'dekanga, pangngassenganga kammayatompa kaporeanna untu' anggappai apa nakaerokia. Mingka kale'bakkanna musti nabokoi anjo sikontu wassele' kaposoanna untu' tau tenaya nammatti' songo'na mae ri anjo apa-apaya. Jari anjo sia-sia tonji, nampa pole tena naadele'!

²²Lalang sikontu umuru' katallassanna rupataua anjama battalaki siagang assusa-susai; nampa kemae wassele' kaposoanna akkullea nakalompoang pa'mai'!

²³ Manna apa mamo le'ba' nagaukang lalang tallasa'na, angngerangi sessa siagang pa'risi' pa'mai' mae ri kalenna. Manna ri wattu bangngia lussa' tonji pa'mai'na. Jari, yangasenna anjo, poro sia-siaji bawang.

²⁴ Tenamo bajikangngang mae ri rupataua nikanaya angnganre, angnginung siagang angkasiaki wassele' jama-jamanna. Kuassengi angkanaya anjo lagi napassareNaji bawang Allata'ala.

²⁵Inaika akkulle angnganre siagang assannang-sannang punna teai Allata'ala.

²⁶ Allata'ala assare kacara'dekang, pangngassengang siagang kate'neang mae ri tau ampakasannangai pa'mai'Na. Mingka tau dorakaya Nasuroi a'boya dalle' nampa napatambung wassele'na untu' nipassareang mae ri tau ampakasannangai pa'mai'Na Allata'ala. Jari yangasenna anjo sia-siaji, sanrapang usaha angngondang anging.