Read Makassar Version – KITTA' MATANGKASA KATO'BA 3 Bible Online

KATO'BA 3 - Makassar Version – KITTA' MATANGKASA bible

KATO'BA 3

¹Sikontu apa-apaya ri anne linoa kajariangi situru' wattu Napattantua Allata'ala.

²Allata'ala ampattantui wattu allassukanga siagang wattu kamateanga, wattu untu' a'lamung siagang wattu untu' ammi'bu',

³wattu untu' ammuno siagang wattu untu' appamolle, wattu untu' anrumbang siagang wattu untu' ambangung.

⁴Allata'ala ampattantui wattu untu' angngarru' siagang wattu untu' ammakkala', wattu untu' appiraung siagang wattu untu' a'joge',

⁵wattu untu' assikatinroang siagang wattu niparrangngi kalea, wattu untu' anraka' siagang wattu nitahang kalenta.

⁶Allata'ala ampattantui wattu anggappaya siagang wattu kapelakkanga, wattu ammoli' siagang wattu a'labo,

⁷wattu untu' angngekke' siagang wattu untu' anjai' wattu untu' a'mereki siagang wattu untu' a'bicara.

⁸Allata'ala ampattantui wattu untu' mangngamaseang siagang wattu untu' mangngabirisi, wattu untu' a'bundu' siagang wattu untu' assiama'.

⁹Apa wassele'na sikontu kaposoanta?

¹⁰Kuassengi angkanaya Allata'ala assareki' erangngang battala'.

¹¹Ia ampattantui wattu kaminang cocoka untu' sikontu apa-apaya. Ia assareki' kaerokang untu' angngassengi allo lanidallekanga, mingka tanikulleai ampahangi gau'Na Allata'ala battu ri pakaramulanna sa'genna kala'busang.

¹²Kuassengi angkanaya untu' ikatte, tenamo bajikangngang nikanaya a'rannu-rannu siagang nipikasiakki tallasaka lalang siapa jaina umurutta.

¹³Bajikangngangi angnganre ngasengki' siagang angnginung kammayatompa nipikasiakki wassele' jama-jamanta. Anjo passareNa ngaseng Allata'ala.

¹⁴Kuassengi angkanaya sikontu bate pare'Na Allata'ala, latuli nia'na satunggu-tungguna. Takkulleai rupataua antambai yareka angkurangngi. Siagang nakamma anjo gau'Na Allata'ala, sollanta malla' mae ri Ia.

¹⁵Apa kajarianga kamma-kamma anne, anu le'ba' memammo kajariang riolo. Apa laniaka, anu sallomo nia'na. Allata'ala ampattantui, sollanna apa le'baka kajariang, kajariang poleangi.

¹⁶Nia' pole kucini' ri anne linoa: kemae mustina nia' kaadelang siagang kabajikang, anjoremmi nia' kaja'dallang.

¹⁷Kupikkiriki angkana, laNaadeli Allata'ala tau bajika siagang tau kodia, nasaba' tunggala' passala' siagang tunggala' panggaukang, lakajariangi situru' wattu Napattantua Allata'ala.

¹⁸Bodona kana iamintu: Naujiki' Allata'ala untu' ampappicinikangi angkanaya anjo sarenta tena sisalana siagang sarenna olo'-oloka.

¹⁹Manna antekamma, anjo sarenna rupataua siagang olo'-oloka sirupaji. Se'rea lamatei, maraengannaya kamma todong. Rua-ruana sangkamma, iamintu apa attallasa'. Jari, tena nala'bi upa' rupataua na olo'-oloka, saba' para sia-siaji anjo tallasaka mae ri ia.

²⁰Sangkammaji tampa' lanatujua ke'nanga. Assala'na ke'nanga iamintu limbu'bu siagang lammotereki mae ri limbu'buka.

²¹Tena niassengi, angkanaya apaka anjo nyawana rupataua a'lampa naiki nampa nyawana olo'-oloka naungi ri buttaya.

²²Jari kuassemmi angkanaya la'bi bajikangngangi punna napikasiakki rupataua wassele' jama-jamanna. Pantaranganna anjo tena lakkulle nagaukang. Tena olona akkulle naasseng apa lakajariang punna matemi.