Read Makassar Version – KITTA' MATANGKASA KATO'BA 4 Bible Online

KATO'BA 4 - Makassar Version – KITTA' MATANGKASA bible

KATO'BA 4

¹Nampa kuparhatikang pole sikamma apa tenaya naadele', ia kajarianga ri anne linoa. Angngarruki tau nijallakkanga, natena tau ero' antulungi ke'nanga. Tena manna sitau ero' ambantui, lanri lompona koasana anjo sikamma tau anjallakkangai ke'nanga.

²Angngiri mata' angngu'rangi tau salloamo mate, lanri mate'neangngammi ke'nanga kala tau attallasaka ija.

³Mingka la'bi mate'neangnganga pole, iamintu tau tenayapa nilassukangi, lanri tenanapa naciniki ke'nanga kaja'dallang nigaukanga ri anne linoa.

⁴Kuasseng tongi angkanaya tamaka batena anjama terasa' rupataua, lanri poro assereatina bawang anciniki wassele' usahana siampi' balla'na. Yangasenna anjo poro sia-siaji bawang, sanrapang usaha angngondang anging.

⁵Nikana bedeng, tau toloaji bawang ammempo anrakaki limanna siagang nabalang parekang kalenna mate lanri cipuru'.

⁶Nakulle kammatojengi, mingka bajikangngangi sike'deka barang-barang assala' sannang pa'maika, kala anjama terasaka siagang rua lima siagang poro angngondang bawang anging.

⁷Nia' ija pole apa sia-sia lalang ri anne katallassanga.

⁸Nia' tau attallasa' kale-kale, tena ana'na yareka sari'battanna. Mingka manna nakamma, tulusu' anjama terasa'na siagang tenale'bakai sukku' ri barang-baranna. Untu' inaika napammattikang tojeng songo' siagang natolla' sikontu kasannanganga? Anjo sia-sia todong, siagang se're cara atallasa' sessa.

⁹Upakkangngangi nikanaya sipa'rua na ia akkale-kalea. Punna anjamai ke'nanga, la'bi bajikangngangi wassele'na.

¹⁰Punna nia' tu'guru' sitau maraenganga akkullei natulung. Mingka punna nia' sitau tu'guru', nampa kale-kalennaja, cilakami, lanri tena tau akkulle antulungi.

¹¹Ri wattu dinginna bangngia, ruaya tau siampi' attinro akkullei sikammuki, mingka antekamma batena lakkulle kammu' punna kale-kalenna?

¹²Punna nia' rua tau sipa'lampang akkulle sibantu angngewa punna nia' ambakkai; mingka punna kale-kalennaji, gampangi nibeta. Tallua otere' nipasikalu' a'jari se're, sukkaraki lanitappu'.

¹³Tu kasi-asia akkullei a'jari karaeng, siagang se'rea tu nitahang akkullei a'lette' nai' ri empoang kakaraenganga. Mingka punna nia' karaeng toamo umuru'na sanna' tolona annarima pappakainga', la'bi kodiangngammi sarenna na turungka kasi-asia mingka cara'deki.

¹⁵Kunawa-nawai passala'na sikontu rupataua ri anne linoa, nakuassemmo angkanaya mattantu nia' ri alla'na ke'nanga sitau tu rungka lansambeangi karaenga.

¹⁶Nakulle kapang teai sipato' jaina ra'ya' napimpinga, mingka punna a'lampamo, tena manna sitau appala' tarima kasi lanri nau'ranginna jasana. Memang, yangasenna poro sia-siaji bawang, sanrapang usaha angngondanga anging.

¹⁷Tutuko punna erokko a'lampa mange ri Balla'Na Batara. Bajikangngang a'lampako mange anjoreng untu' appilajara', kala untu' assarea koro'bang, sangkamma nagaukanga tau toloa. Anjo ke'nanga takkulleai naasseng angkana kereanga annaba siagang sala.