Read Makassar Version – KITTA' MATANGKASA KATO'BA 5 Bible Online

KATO'BA 5 - Makassar Version – KITTA' MATANGKASA bible

KATO'BA 5

¹Appikkirikko rolong nunampa a'bicara, siagang teako linta' dudu a'janji mae ri Allata'ala. Ia niaki ri suruga nampa ikau niakko ri buttaya. Jari tutuko ri kana-kanannu.

²Pila' ranggaselai taua, pila' akkullei anggappa so'na kodi. Pila' jai bicara, pila' akkullei taua appasulu' kana-kana tolo.

³Jari, punna a'janjiko mae ri Allata'ala, rupai linta' janjinnu. TaNangaiyai Allata'ala tau a'gau' toloa. Lanri kammana anjo, rupai janjinnu.

⁴ Bajikangngangi tenaya ni'janji, kala a'janjia na tanirupaia.

⁵Teako lanri passala' kana-kanannu nudoraka, sa'gennu musti mangaku mae ri imang allayania ri Batara, angkana sala pauko ri janjinnu. Untu' apa nanupakalarro Allata'ala sa'genna Naancuru' wassele' jama-jamannu?

⁶Sangkamma jaina so'na tena battuanna, kamma tomminjo jai bicara tena matu-matunna. Mingka malla' lalo mako mae ri Batara.

⁷Teako lannassi punna nucini' tukoasaya anjallakkangi tu kasi-asia, narampasa' ha'na ke'nanga siagang tanasarea ke'nanga kaadelang. Tunggala' se'rea pagawe nikatutui ri atasanna, nampa rua-ruai nikatutui ri atasang la'bi tinggianganga pangka'na.

⁸Ba'lalo manna karaenga tanjeng tongi mae ri wassele' kattoa.

⁹Tau balalaya ri doe', tale'bakai ganna'-ganna' doe'na; tau pongoroka ri barang-barang, tale'bakai sangga sukku' ri passawallang. Yangasenna sia-siaji bawang.

¹⁰Pila' jai kakalumanynyangngang ri se'rea tau, pila' jai tau maraeng musti nasare kanre. Tena passawallang mae ri patanna, poro naassennaji bawang angkana akkalumanynyangi.

¹¹Setrea pajama akkullei tagannakka ri kanre, mingka kaminang sike'de'na akkullei baji' tinrona. Kabalekanna, se'rea tau kalumanynyang, jai sikali barang-baranna, sa'genna takkulleai attinro napakamma lussa'.

¹²Nia' kucini' ri anne linoa sanna' appakasi'nana pa'mai': Nia' se're tau appatambung barang-barang untu' wattu kakurangang.

¹³Mingka tappela' ngasengi anjo baranga lanri nia'na bala, sa'genna tenamo apa-apa akkulle nasareangi ana'-ana'na a'jari warisi'.

¹⁴Ri wattunta nilassukang assolarakki'; kamma tomminjo punna nibokoi linoa anne, tena apa-apa battu ri wassele' posota nierang.

¹⁵ Anjo kammaya teai sipato' appakasi'nana! A'lampaki' sangkamma ri wattunta battu. Nimangngangngi kalenta untu' angngondang anging, nampa apa wassele'na?

¹⁶Lalang tallasatta, kammaki' tau angngosala' lalang ri sassang, susa-susaki', lussakki', birisikki', siagang pa'risi' pa'maikki'.

¹⁷Jari kupahammi angkanaya ia kaminang bajika mae ri katte iamintu angnganre, angnginung, siagang nipikasiakki wassele' jama-jamanta lalang katallassang sinampe' Napassareanga Allata'ala mae ri katte; iami anjo sarenta.

¹⁸Punna nia' sitau annarima kakalumanynyangngang siagang barang-barang battu ri Allata'ala, nampa nisare ising untu' ampinyamangngi anjo kakalumanynyangnganna, musti appala' sukkuruki siagang nakasia' baji' sikontu wassele' jama-jamanna. Anjo kammaya passareNa tonji bawang Allata'ala.

¹⁹Nabonei Allata'ala sa'genna rassi pa'mai'na taua anjo siagang karannuang; jari tena nalussa' annawa-nawai ri passala' sinampe'naja anne tallasaka.