Read Makassar Version – KITTA' MATANGKASA KATO'BA 6 Bible Online

KATO'BA 6 - Makassar Version – KITTA' MATANGKASA bible

KATO'BA 6

¹Kuciniki pole apa tenaya naadele' anjallakkangi rupataua ri anne linoa.

²Nia' wattunna naNasare Allata'ala kakalumanynyangngang, kalompoang siagang barang-barang se're tau, sa'genna tenamo apa-apa maraengang nakaeroki. Mingka tena Nikellai ri Allata'ala anjo taua angkasiaki baji'na anjo sikontu passarena. Kabalekanna, tau tenaya Naassengi langkabajikangi anjo kakalumanynyanganna. Jari, yangasenna anjo poro sia-siaji bawang, siagang appakasi'naji pa'mai'.

³Manna pole nania' sibilangngang ana'na se'rea tau, siagang attallasaki sa'genna toa umuru'na, mingka tena namate'ne nakasia' siagang tena todong nanggappa pa'jerakkang siratannaya; jari turu' panggappaku, bajikangngangi sarenna ana' lolo matea ri lassu'na kala sarenna anjo taua.

⁴Saba' tena na'jari passala' mae ri anjo ana' loloa angkanaya apaka nilassukangi yareka tena; a'lampai antama' ri sassanga, nampa linta'mo nikaluppai.

⁵Tena le'bakai accini' allo, siagang tena tompa napahangi angkana apa anne katallassanga, sa'genna akkullemi sannang anra'ba ri tinrona.

⁶Na anjo kammaya la'bi bajikangngangi kala tau attallasaka ruambilangngang taung, mingka tale'bakai mate'ne. Sai rua-ruana a'lampai mange ri tampa' sangkammaya?

⁷Anjamai rupataua untu' angnganre, mingka tena le'bakai sukku' pakkasia'na.

⁸Jari, apa kaupakkanna tau cara'deka punna nipasinrapang siagang tau toloa? Apa todong matu-matunna punna baji' gau'na tu kasi-asia ri tangnga-tangngana tau jaia?

⁹Yangasenna anjo poro sia-siaji bawang, sanrapang usaha untu' angngondang anging. La'bi bajikangngangi sukkukamo ri apa niaka ri katte naia tuli eroka la'bi jaiangngang.

¹⁰Yangasenna apa niaka, sallo memammi nia'na. Niassengi angkanaya takkulleai taua anggeakki tau la'bi gassinga na kalenna.

¹¹Pila' salloi a'gea', pila' tena anggaranna kana-kananna, ba'lalo tena apa-apa passawallang nagappa.

¹²Antekamma batena nakkulle taua angngassengi angkana apa kaminang baji' mae ri kalenna lalang katallassang sinampeka anne siagang tenaya matu-matunna, allaloa sanrapang bayang-bayang? Antekamma akkulle naasseng taua apa lakajarianga ri anne linoa punna matemi?