Read Makassar Version – KITTA' MATANGKASA KATO'BA 7 Bible Online

KATO'BA 7 - Makassar Version – KITTA' MATANGKASA bible

KATO'BA 7

¹ Areng bajika mabaukangngangi na minynya'-minynya' ka'jalaka ballinna; siagang allo kamateanga bajikangngangi na allo kalassukanga.

²Bajikangngangi a'lampaya mange ri balla' kasusaanga naia mangea ri balla' passua'-suarranga. Saba' musti tuli niu'rangi angkanaya attayangi kamateanga mae ri tunggala' taua.

³Si'naya bajikangngangi na kakkalaka. Manna kacci tanjaka, assala' assaui pa'maika.

⁴Tau toloa tulusu' angngondangi kasannangngang; tau cara'deka tuli kamateang nanawa-nawa.

⁵Bajikangngangi nipasailea ri tau bajika akkala'na, kala nipalecea ri tau sukkaraka ammahang.

⁶Kakkala'na tau toloa tena matu-matunna, rapang sa'ra katinting nakanre pepe'.

⁷Punna annipu tau cara'deka, toloi panggaukanna; punna annarima doe' pammuccu', panra'mi sipa'na.

⁸Bajikangngangi kale'bakkanna kara-karaya naia uru-uruna; bajikangngangi sa'baraka kala tinggi pa'maika.

⁹ Teako linta' dudu larro; tau toloaji bawang ammoli' larro.

¹⁰Teako akkuta'nangngi angkana, ‘Angngapa nabajikangngang jammang riolo na jammang kamma-kammaya anne?’ Tau toloaji akkuta'nang kamma.

¹¹Tau attallasaka mustina nia' kacara'dekanna; anggaranna anjo kacara'dekanga sangkammai barang pisaka;

¹²sangkamma tongi doe' assareaki' pakkasia' amang. La'biangampa pangngassengang nikanaya kacara'dekang! Inai ampatangi, iami lasalama'.

¹³Parhatikangi jama-jamanNa Allata'ala. Saba' inai akkulle allambusi apa Napa'jekkoa Allata'ala?

¹⁴Jari, rannu mako punna natabako upa'. Mingka punna natujuko bala, teako kaluppai angkanaya Allata'ala assareko rua-rua. Taniassengai apa lakajarianga ribokoangannaya.

¹⁵Tallasakku tena matu-matunna, mingka lalang tallasakku nia' kucini' kammaya anne: Nia' wattunna napanra' tau bajika, manna pole natau baji'. Nia' wattunna nala'bu umuru'na tau ja'dalaka, manna pole natuli nagaukang dosaya.

¹⁶Teako baji' dudui siagang teako cara'de' dudui. Apa matu-matunna nibuno kalea?

¹⁷Tea tongko ja'dala' dudui siagang teako dongo' dudui. Untu' apa matea punna tanarapikapa wattunna?

¹⁸Liliangi anjo ruaya sumpadeng. Punna mallakki' ri Allata'ala, mattantu labajiki wasseletta.

¹⁹Kacara'dekanga napa'jari taua poreangngang na sampuloa tukoasa ri se'rea kota.

²⁰Tena tau sukku' baji'na ri linoa anne; tena tuli a'gau' baji' siagang tale'baka doraka.

²¹Teako nungai ampilangngeri bicara battu pantaraka, gassingka natunraiko se'rea palayang.

²²Musti nuasseng tongi kalennu angkana le'ba' tongi nutunrai parannu tau.

²³Yangasenna anjo kuuji siagang kacara'dekangku. Mingka pila' kuboyai anjo kacara'dekanga, pila' bellai battu ri nakke.

²⁴Inai akkulle anggappai battuanna anne tallasaka? Tamaka lantanna untu' akkulle nipahang!

²⁵Mingka na'naka' appilajara' siagang a'boya pangngassengang, sollanna kugappa kacara'dekanga siagang kugappa pialinna sikamma pakkuta'nang niaka. Kucobai ampahangi angkanaya anjo dosaya katoloang, siagang anjo kaja'dallanga katerassang pa'mai'.

²⁶Kupahammi angkanaya anjo bainea paikangngangi na matea. Pangngaina bainea rapang jala siagang sikko', sadiai ero' anjakkala'. Tau anggaukangai ero'Na Allata'ala, nipalili battu ri anjo sikko'na, mingka tau dorakaya mattantu laniallena.

²⁷Nakana Tau Assarea Pangngajarang: Ciniki, yangasenna anjo kugappai kupahang, ri wattunna kuboya tassike'de'-tassike'de' pappialia.

²⁸Kuboya iji pappiali maraenga, mingka tenamo nakugappai. Ri sisa'bua tau, nia' kugappa sitau bura'ne kupakalompoa. Mingka tena ri ke'nanga kugappa baine akkulle kuanggara'.

²⁹Poro iaji anne bawang kugappa: Napa'jari tubiasaki' Allata'ala siagang tena sukkara'na. Mingka kalenta tonji ampa'jari sukkaraki kalenta.