Read Makassar Version – KITTA' MATANGKASA KATO'BA 8 Bible Online

KATO'BA 8 - Makassar Version – KITTA' MATANGKASA bible

KATO'BA 8

¹Tamaka sannanna tau cara'deka. Naassengi pialinna sikamma parkaraya. Kacara'dekanga ampa'jari rannui siagang ta'muri, sa'genna tuli accaya rupanna.

²Mannurukiko punna nasareko parenta karaenga, teako sambarangngi a'janji mae ri Allata'ala.

³Karaenga akkullei appaero'-ero' ampanggaukang, punna tamangngaia, bajikangngang pakabellai kalennu ri ia.

⁴Appanggaukangi karaenga lanri koasana; tena barani anggeakki!

⁵Tau mannurukia ri ia, laamangi na salewangang; tau cara'deka naassengi angkana ringngapanna siagang antekamma carana mannurukia ri karaenga.

⁶Yangasenna apa-apaya nia' wattunna siagang nia' massing carana, mingka sike'de' duduji nipahanga!

⁷Tena manna sitau angngassengi angkana sare antekamma attayanga, na tena akkulle ampaui apa lakajarianga.

⁸Tena manna sitau akkulle antahangi yareka ampamonoki wattu kamateanna. Anjo parjuangang kammaya takkulleai naliliang, takkulleai ta'lappasa' battu ri ia, manna pole appare' akkala' yareka annipu.

⁹Yangasenna anne kuciniki ri wattunna kuparhatikang sikontu apa kajarianga ri linoa. Nia' wattunna nanapake kakoasanna taua untu' ancilakai paranna tau.

¹⁰Le'baki kucini' tau ja'dalaka mate siagang nitarawang. Mingka ri wattunna ammotere' taua battu ri jera'na, nipujimi anjo tau matea ri ke'nanga anjoreng ri kota tampa'na anggaukangi kaja'dallanga. Jari, anjo sia-sia tonji.

¹¹Angngapa nagampang kamma taua anggaukangi kaja'dallanga? Lanri tenana nalinta' nipitabai hukkungang.

¹²Manna sibilangngang kaja'dallang nagaukang se'rea tu doraka, tuli attallasa'na, ba'lalo la'bui umuru'na. Bedeng, nakana taua inai mannuruki ri Allata'ala, mattantu sarro bajiki tallasa'na.

¹³Kabalekanna, tau ja'dalaka anggappai jai kasukkarrang. Lintaki allalo tallasa'na rapang bayang-bayang. Lamatei ri wattu rungkana lanri tena namannuruki mae ri Batarana.

¹⁴Mingka yangasenna anjo sangnging bicara kosong. Cinikimi apa kajarianga ri lino: Nia' tau baji' nihukkung sangkamma tau doraka lompo, nia' tau ja'dala' nisare pahala kamma tau baji'. Jari, anjo sia-sia tonji.

¹⁵Bodona pikkirangku iamintu angkana musti rannui taua. Lanri lalang tallasa'na ri lino tena kasannangngang untu' kalenna pantaranganna angnganrea, angnginunga siagang a'rannu-rannua. Iaji anjo bawang akkulle nakasia' battu ri kaposoanna, lalang tallasa' Napassareanga Allata'ala mae ri ia.

¹⁶Ri wattunna kuusahai anggappa kacara'dekang, na kuparhatikang sikontu apa kajarianga ri linoa anne, kuassemmi angkanaya manna kisusa tojeng attuju allo bangngi tammari-maria,

¹⁷takkulleaki' ampahangi apa ero'Na Allata'ala. Manna antekamma bateta usaha, tena olona lakkulle nipahang. Tau cara'deka nakana kalenna napahangi, mingka sikontutojenna tanapahangngai.