Read Makassar Version – KITTA' MATANGKASA KELONG MALA'BIRI' 1 Bible Online

KELONG MALA'BIRI' 1 - Makassar Version – KITTA' MATANGKASA bible

KELONG MALA'BIRI' 1

¹ Kelong Mala'biri' napareka Salomo.

²Bauma' siagang muncennu; la'bi nyamangi pangngainu na anggoro'!

³Ikau sanna' mabau'nu, arennu sanrapang minynya' mabau' tattumpaya; lanri kammana minjo nanangaiko tuloloa!

⁴Umba linta', o, karaengku, eranga' antama' ri kamara'nu. Lanri ikau nama'reja-reja ngaseng ikambe, mammuji ri pangngainu la'bia na anggoro'; siratang memangi tuloloa ero' ri kau!

⁵Manna kule'leng, mingka ga'gai tanjakku, he tulolonna Yerusalem; le'leng rapang kema-kemana Kedar mingka ga'gai rapang gordeng-gordenna balla' lompona Salomo!

⁶Teako parhatikangngi bukkuleng le'lengku, lanri nitaba' ri bambang allo. Larro ngasengi sikamma daengku ri nakke, kunasuro anjama ri koko anggoro'; tena kusawe angngurusuki kalengku.

⁷Paumi, he tanringku, kemaeko akkalawaki gimbala' kemae nupatinro ke'nanga punna karueng? Masakang lasanrapanga' tau padete' ri alla'-alla'na gimbala'na sikamma belanu?

⁸Masakang tanuassengai tampa'na, he tuga'gaya ri sikamma bainea? Pinawang mami bate bangkenna gimbalaka, na kalawakimi sikamma bembenu ri ampi' kemana sikamma pakalawakia.

⁹Tanringku, ikau rapang jarang gana ambesoki karetana karaeng Mesir.

¹⁰Ga'gai pilisi'nu alla'na belo-beloa, kallong ga'ganu ammake rante paramata.

¹¹Nipapparekangko belo-belo bulaeng, ammakea mani'-mani' pera'.

¹²Lalang anra'bana karaengku ri katinroanna, ma'rasai minynya' mabaukku.

¹³Tanringku rapangi muru' rasa mabau'na, ri wattu anra'bana ri barambangku.

¹⁴Tanringku rapangi bunga attimboa ri koko-koko anggoro' En-Gedi.

¹⁵Teai sipato' ga'ganu, sayang, tojeng tamaka ga'ganu! Matannu, rapangi mata bodobangkeng.

¹⁶Ikau gammara', sayang, tojeng tamaka gammara'nu! Ruku' moncongbuloa katinroanta.

¹⁷Poko' kayu arasa' a'jari benteng ballatta, na poko' kayu camara a'jari pammakkanna.