Read Makassar Version – KITTA' MATANGKASA KELONG MALA'BIRI' 2 Bible Online

KELONG MALA'BIRI' 2 - Makassar Version – KITTA' MATANGKASA bible

KELONG MALA'BIRI' 2

¹Inakke poro bunga rosija' battu ri Saron, rapang bunga bakung niaka ri ka'bung.

²Rapang bunga bakung ri tangngana rompo' katinting, kammami anjo tanringku ri alla'na sikamma tuloloa.

³Rapang poko' appele' ri tangngana poko' kayu romang, kammami anjo tanringku ri alla'na tu bura'nea. Sannang nyawaku a'la'lang rawanganna, rappo-rapponna te'nei kasia'na.

⁴Naeranga' mae ri tangngana pa'gaukanga, paccini'na ri nakke sangnging pangngai.

⁵Pakajarreka' siagang te'nena rappo anggoroka, pakkamalea' siagang rappo appele', lanri inakke garring pattanringa'.

⁶Lima kairinna anriwai ulungku, na lima kananna anrakaka'.

⁷A'janjiko, he sikamma tulolonna Yerusalem, lanri sikamma jongaya siagang kijanga ri parang, angkana talanugangguai passingaianga sa'genna nipassukku'.

⁸Pilangngeri! Niaki battu tanringku! Rapangi ana' jonga yareka kijang. A'lumpa'-lumpa' ri moncong, a'lumpa'-lumpa' ri bulu'. Ciniki, niaki ammenteng ri bokona temboka, a'boya-boyai matanna; attoa' battu ri taralina jandelaya.

¹⁰Pilangngeri, a'bicarai tanringku mae ri nakke. Battu mako sayangku, mae mako tuga'gaku!

¹¹Ciniki, allalomi wattu dinginga, wattu bosia allalomi.

¹²Ta'bakkara'mi bunga-bunga ri kokoa; battumi wattunna lanicukkuru'; assa'rami bukkuruka ri tampatta.

¹³Appakkaramulami a'rappo poko' araya, a'rasami bau'na bunga poko' anggoroka. Battu mako sayangku, mae mako tuga'gaku.

¹⁴O, bodobangkengku niaki ri alla'na batua, ri paccokkoang tubiri'na moncong batua, boli'mi kamma kucini' tanja'nu, nakulangngere' sa'rannu, lanri ga'gai tanja'nu, na baji' sa'rannu.

¹⁵Jakkalaki anjo olo'-olo' rubaya, ruba-ruba ca'di ammanrakia koko anggoro', saba' sitabangi ta'bakkara' bunga anggoroka ri kokonna ikambe.

¹⁶Tanringku inakke pata, na inakke ia pata, nakalawaki sikamma gimbala'na ri alla'na bunga-bunga bakunga

¹⁷sa'genna ammiri' anging bari'basaka napa'lanynya' sassanna bangngia. Ammotere' mako, tanringku, rapang kijang, rapang ana' jonga ri monconna Beter.