Read Makassar Version – KITTA' MATANGKASA KELONG MALA'BIRI' 3 Bible Online

KELONG MALA'BIRI' 3 - Makassar Version – KITTA' MATANGKASA bible

KELONG MALA'BIRI' 3

¹Bangngi-bangngina, ri katinroangku, kuboya tanringku lalang so'na; kuboyai, mingka sia-siaji bawang.

²Eroka' ambangung na kua'lampa akkuliling kota, anjappai sikontu aganga siagang loronga. Eroka' amboyai tu ta'dongkoka ri atingku; kuboyai, mingka sia-siaji bawang.

³Kubattui paronda kotaya, na kukuta'nang, “Tanucinikai tu ta'dongkoka ri atingku?”

⁴Silalonna kubokoi ke'nanga, kugappami tu ta'dongkoka ri atingku. Kuta'gala'mi, taeroka' allappassangi sa'genna kuerang mange ri balla'na ammakku, ri bili'na tungnganakkangku.

⁵A'janjiko, he sikamma tulolonna Yerusalem, lanri sikamma jongaya siagang kijanga ri parang, angkana talanugangguai passingaianga sa'genna nipassukku'.

⁶Apa kutadeng anjo niaka battu ri parang lompoa, sangkamma umbu a'rumbua? Bau'na sangkammai muru' siagang kamanynyang, siagang ba'ra' battua ri padangganga.

⁷Ciniki, anjo bulekanna Salomo, nikulilingi ri annampulo tau gammara', tau gammara'na Israel,

⁸niaka pangalamanna a'bundu'. Assele' ngasengi ke'nanga pa'dang ri aya'na sadia andallekangi tau a'bakkaya ri wattu bangngi.

⁹Napapparekangi Salomo kalenna bulekang, battu ri kayu kaminang bajika.

¹⁰Bentenna battu ri pera' nipare' pammanjenganna battu ri bulaeng. Tampa' pammempoanna cura' lame butung tanja'na, nisulang sanna' baji'na ri ati mate'nena tulolonna Yerusalem.

¹¹Assulukko, he sikamma tulolonna Sion, ciniki Karaeng Salomo siagang songko' bulaeng nipataba ri amma'na ri allo pa'buntinganna, ri allo pa'rannu-rannuanna.