Read Makassar Version – KITTA' MATANGKASA KELONG MALA'BIRI' 5 Bible Online

KELONG MALA'BIRI' 5 - Makassar Version – KITTA' MATANGKASA bible

KELONG MALA'BIRI' 5

¹Battua', mae ri kokongku, andi', buntingku, appasse'rea' muru' siagang rampa-rampa; kukanrei ru'mung baniku siagang je'ne' baniku, kuinungi dadika siagang je'ne' anggorokku. Angnganre siagang angnginung ngaseng mako, bela-belaku, angnginungko sa'gennu nasa'ring pattanringang.

²Attinroa', mingka tattinroai nyawaku. Langngereki, a'de'deki pakke'bu' tanringku. Sungkeia' pakke'bu', andi', tanringku, bodobangkengku, nakate'neanga pa'maikku; basai ulungku napakamma saliu', uukku rassi atti'na saliu' bangngia.

³Le'ba'mi kula'gasa' bajungku; apaka kupake poleangi? Le'ba'mi kubissai bangkengku, apaka lakura'massi poleangi?

⁴A'dumba'-dumbaki pa'maikku lanri nata'gala'na tanringku ta'gallang pakke'buka.

⁵Nakumbangummo nai' ero' ansungkeangi pakke'bu' tanringku. Ammatti' muruka battu ri limangku siagang karemengku, ambasai ta'galanna panjoli pakke'buka.

⁶Kusungkei pakke'bu' tanringku, mingka a'bokomi lampana. Sanna' nakkukku ri sa'ranna; kuboyai, mingka sia-siaji bawang. Kukioki arenna, mingka tena nappiali.

⁷Nabattuia' paronda kotaya; naba'jia' ke'nanga sa'gengku loko', naalle passai bongongku.

⁸A'janjiko, he sikamma tulolonna Yerusalem, punna nubuntulu' tanringku, pabattu laloi mae ri ia angkana garringa' ri pattanringang.

⁹Apaka la'biangngangi tanrinnu na tanring-tanring maraenga, he tulolo kaminang ga'gaya? Apaka la'biangngangi tanrinnu na tanring-tanring maraenga, sa'genna nusuro ikambe a'janji?

¹⁰Tanringku ga'gai siagang gammaraki, ia kaminang pore ri sampulo sa'bu tau.

¹¹Ulunna rapangi bulaeng, bulaeng ti'no', uu'na akkarucicci' le'leng, le'leng kamma kalaa'.

¹²Matanna rapangi mata bodobangkeng ri timbuseng je'ne', bodobangkeng a'je'ne' dadi', ammempo ri biring kollang.

¹³Pilisi'na rapangi koko rampa mabau', muncenna rapang bunga bakung appamatti' muru' tanibengkoro'.

¹⁴Limanna ga'gai, accincing bulaeng siagang paramata, kalenna rapangi gading nisapu ri batu accilla'.

¹⁵Bangkenna rapangi benteng-benteng tembo' accilla' kebo', nilangga ri bulaeng ti'no'. Pakkaleanna sanrapangi bulu'-bulu' Libanon, gammara' kamma poko' kayu arasa'.

¹⁶Tamaka baji'na pau-pauanna, yangasenna ri kalenna angngallei pa'mai'. Kammaminjo tanringku siagang sahabakku, he sikamma tulolonna Yerusalem!