Read Makassar Version – KITTA' MATANGKASA KELONG MALA'BIRI' 6 Bible Online

KELONG MALA'BIRI' 6 - Makassar Version – KITTA' MATANGKASA bible

KELONG MALA'BIRI' 6

¹Kemae lampana tanrinnu, he tulolo kaminang ga'gaya? Kemae lampana tanrinnu, sollanna amminawang todong ikambe a'boya?

²Tanringku mangei ri kokonna, ri koko rampa-rampana untu' angkalawaki sikamma gimbala'na ri kokoa, nampa angngattili' bunga-bunga bakung.

³Inakke napatanga' tanringku, na ia kalenna inakke pata, nakalawaki gimbala'na ri tangngana bunga-bunga bakunga.

⁴Ikau ga'ga, sayangku, sangga'ga kota Yerusalem, sambaji' kota Tirzah. Sanna' angngallenu pa'mai', rapang tantara siagang bandera-banderana.

⁵Allei rupannu battu ri nakke, lanri lingua' napakamma to'ro matannu. Uu'nu rapangi pa'gompoang bembe niaka naung battu ri bulu'-bulu' Gilead.

⁶Giginnu keboki rapang passe'reang gimbala' beru le'baka nicukkuru' siagang nije'ne'; appasang sanrapang ana'-ana' gimbala' akkambara', manna se're tania' tappela'.

⁷Pilisi'nu rapangi rappo delima nipue rua, taccokko ri bokona bongonnu.

⁸Manna pole nia' annampulo tulolo ana' karaeng, na sagantujupulo baine piara, kammayatompa jai sikali tulolo,

⁹mingka se'reji bawang bodobangkengku, minasangku, ana' sitau nisayanna ri amma'na. Sikamma tulolo accinika mammuji ngaseng ri ia, sikamma baine karaeng siagang baine piarana lannasa' ngaseng.

¹⁰Inaika anjo battu mae, rapang allo ammumbaya, sangga'ga bulang cora, singara' kamma allo? Sanna' angngallena pa'mai', rapang tantara siagang bandera-banderana.

¹¹Battua' mae ri koko kenari, accini' bunga-bunga ri ka'bung; gassingka a'bungami poko' anggoroka, siagang poko' delimaya kamma todong.

¹²Sanna' nakkukku ri pangngainu, rapang nakkukku nai' ri kareta pa'bundukang siagang sikamma bija karaenga.

¹³A'jogekko, he tulolonna Sulam, painro-inroi kalennu, sollanna baji' nacini' ikambe. Angngapa nuero' ngaseng ancinikia', ri wattungku a'joge' ri tangnga-tangngana pacini'-cinika?