Read Makassar Version – KITTA' MATANGKASA KELONG MALA'BIRI' 7 Bible Online

KELONG MALA'BIRI' 7 - Makassar Version – KITTA' MATANGKASA bible

KELONG MALA'BIRI' 7

¹O, tulolo mala'birika, ga'gana bangkennu ampakei anjo sandalaka. Bundala'na bonggannu rapangi belo-belo nipareka ri sitaua panre.

²Pocci'nu rapangi cangkiri' a'bundala' tenaya nale'ba' kakurangang ri anggoro' nicampuru'. Battannu rapangi gandung nipatambung, nikulilingi ri bunga-bunga bakung.

³Susunna rapangi rua ana' jonga, kijang akkambara' ruaya.

⁴Kallonnu rapangi menara gading, Matannu rapangi kollang-kollang ri Hesybon, ri ampi' pakke'bu' lompona Batrabim. Ka'murunnu rapangi menara ri Moncong Libanon, a'dalle' mangea ri kota Damsyik.

⁵Ulunnu rapangi Bulu' Karmel; uu'nu nisimbolengi rapang rammang, ba'lalo angngallei pa'mai'na se'rea karaeng.

⁶Tamaka ga'ganu, kaminang ningaia ri sikamma ningaia.

⁷Tubunu sangkammai gammara'na poko' korma, susunnu rapang barrisi'na rapponna.

⁸Erokka' angngambiki anjo poko' kormaya, nakualle rapponna. Susunnu paleng rapangi barrisi'na rappo anggoro', nappasa'nu sambauki rappo appele',

⁹bawanu te'ne kammai anggoro'! Lappassammi assolong anjo anggoroka mae ri tanringku, assolong tena tappu'na; appabangunga tanring passingaiang, ba'lalo ri sikamma tau attinroa.

¹⁰Inakke napatanga' tanringku, eroki ri nakke.

¹¹Umba kimange ri parang, tanringku, ki'bangngi ri kokoa ri tangnga-tangngana bunga pacaraka.

¹²Umba ki'lampa bari'basa' mange ri kokoa, anciniki gassingka a'rappo ca'dimi poko' anggoroka, yareka ta'bakkara'mi bunganna; gassingka a'bungami poko' delimaya. Anjoreng lakusareko tanringku.

¹³Aka' poko' kayu mabau' rasanna, ri ampi' pakke'butta nia' rappo-rappo kayu nyamang, salloamo siagang berua le'ba' niallena; kuboliki anjo untu' ikau, tanringku.