Read Makassar Version – KITTA' MATANGKASA KELONG MALA'BIRI' 8 Bible Online

KELONG MALA'BIRI' 8 - Makassar Version – KITTA' MATANGKASA bible

KELONG MALA'BIRI' 8

¹Ah, ebara' angkana assari'battang tangkakki', le'baka anynyusu ri ammakku, mattantu kubauko punna kugappako ri aganga, tena tau langhina'.

²Lakuerangko mange ri balla'na ammakku, sollanna akkullea' nuajara'. Lakusareko angnginung anggoro' bauka rasanna, siagang je'ne' rappo delima.

³Lima kairinnu anriwa' na lima kannannu anrakaka'.

⁴A'janjiko, he sikamma tulolonna Yerusalem, angkana talanugangguai passingaianga, sa'genna nipassukku'.

⁵Inaika anjo, niaka battu ri parang lompoa ammanjeng ri tanrinna? Kupabangungko irawanganna poko' appele', tampa'nu nitianangngang siagang nilassukang.

⁶Pa'jaria rappo ri atinnu, teako nia' maraeng nuraka' pantaranganna inakke; lanri anjo passingaianga sangkammai kassa'na kamateanga, na anjo napasua makoasai rapang kamateang. Rinrana rapangi rinrana pepeka a'rinra sannaka heba'na.

⁷Manna je'ne' jai takkulei nabuno pepe'na passingaianga, na a'baya takkulleai naanyukkang. Punna nia' tau ampassareangi sikontu barang-baranna untu' amballi passingaianga, mattantu poro pa'hinaji bawang lanagappa.

⁸Nia' sitau baine andi'na ikambe ca'di iji susunna. Apa musti nagaukang ikambe mae ri ia punna nia' battu ampassuroi?

⁹Ebara' angkana ia se're tembo', lambangungi ikambe menara pera' irateanna. Ebara' angkana sanrapangi pakke'bu' lompo lanajoli kambe siagang balo' kayu camara.

¹⁰Inakke anne rapanga' se're tembo', na susungku rapang a'jari menarana. Naassengi tanringku angkana punna niakka' ri ia lamate'nei pakkasiakku.

¹¹Nia' koko anggoro'na Salomo ri Baal-Hamon; anjo kokoa napassareangi mae ri pajagaya. Massing a'bayaraki sisa'bu doe' pera' untu' wassele'na

¹²nampa anggappa ruambilangngang untu' sawala' posona. Boli'mi anjo doeka untu' ikau, Salomo, siagang untu' sikamma pajaga kokonnu. Mingka koko anggorokku, kalengku pata, niaki ri dallekangku.

¹³He, tau ammantanga ri kokoa, eroki aganga allangngereki sa'rannu; pilangngeriamma' anjo sa'rannu!

¹⁴Tanringku, battu mako mae rapang kijang, rapang ana' jonga battua ri monconna Beter.