Read Makassar Version – KITTA' MATANGKASA YESAYA 10 Bible Online

YESAYA 10 - Makassar Version – KITTA' MATANGKASA bible

YESAYA 10

¹Cilakako kau appareka hukkung tenaya naadele' untu' anjallakkangi bansaKu.

²Kammaminjo caranu anrompai tu kasi-asia anggappai ha'na siagang kaadelanga, siagang nurampasa' apa-apanna sikamma jandaya siagang ana' kukanga.

³Apa lanugaukang punna narapi' wattunna Allata'ala anghukkungko? Apa kullenu ri wattunna Napabattu balaya battu ri pa'rasangang bellaya? Inai lanupappala' tulungi? Kemae lanucokko anjo kakalumanynyangannu?

⁴Ia mami sarennu iamintu nibunoa lalang bundu' yareka nieranga a'lampa a'jari tunitahang. Mingka tuli larroNa ija Batara siagang tuli Nahukkunna ija ke'nanga.

⁵ Nakana Batara, “Cilakai Asyur! Asyur laKupake a'jari cambo' siagang palu-palu untu' antunrungi tau natabaya pangngalarroingKu.

⁶LaKukiringi Asyur mange ambunduki bansaKu a'bokoa ri Nakke siagang ampakanassuA'. LaKusuroi Asyur mange angngellaki, allukkaki siagang angngonjo'-onjokangi bansaKu rapang limbu'bu' ri aganga.”

⁷Mingka karaeng Asyur nia' rancana kalenna. Eroki ampakei katerassanga siagang napaccappu' jaia bansa.

⁸Lanapa'borroangi kalenna, na nakana, “Sikamma panglimaku sangnging karaeng!

⁹Kualle passai kota-kota Kalno siagang Karkemis, Hamat siagang Arpad. Kualle tongi kota-kota Samaria siagang Damsyik.

¹⁰Kubetai sikamma kakaraengang anynyombaya ri barhala-barhala lompoangnganga koasana naia niaka ri Yerusalem siagang Samaria.

¹¹Samaria siagang sikontu barhalana le'ba'mi kupanraki. Kamma tomminjo lakugaukang mae ri Yerusalem kammayatompa mae ri sikamma barhala niaka nisomba anjoreng.”

¹²Mingka Nakana Batara, “Punna le'ba'mo apa eroka Kugaukang ri Bulu' Sion siagang ri Yerusalem, laKuhukkungi karaeng Asyur lanri kaborroanna siagang katampoanna.”

¹³Lompo bicarami karaeng Asyur, nakana, “Yangasenna anjo kugaukangi lanri kagassingang kalengku. Inakke cara'deka' siagang porea'. Kupelaki pa'baeng-baenna bansa-bansaya, kurampasaki parsadiaanna ke'nanga. Rapang tedong romang, kuonjo'-onjokangi sikamma tau ammarentaya.

¹⁴Bansa-bansaya ri lino rapangi ru'mung jangang-jangang; gampang sikali kualleang barang-baranna ke'nanga, rapang tau angngallea bayao nibolika ri ru'munga. Tena ka'nyi' anrapa-rapa, tena assungkei pitto'na untu' acciu'-ciu'.”

¹⁵Mingka Nakana Batara, “Maka akkullei napattampoang kalenna pangkuluka mae ri tau ampakei ammangkulu'? Maka la'bi paralluangangi garagajia na tau ampagaragajiai? Teai palu-palua angngangkaki taua, passangalinna tauaji angngangkaki palu-palua.”

¹⁶Lanri tu Asyur napattampoangi kalenna, laNapabattui Batara Kaminang Makoasaya garringa, untu' anghukkungi sikamma perwira porena ke'nanga. Ia ke'nanga lanatabai rammusu' lompo, rapang pepe' akkanrea tulusu' ambambangi ke'nanga.

¹⁷Allata'ala matangkasaka, Cayana Israel, la'jari pepe' angkanreai sikamma apa niaka lalang siallo bawang, ba'lalo sikamma rompo' katintinga.

¹⁸Sikamma romang lompoa siagang sikamma koko copponga buttana ri pa'rasangang Asyur lanipaccappu' taba sikali, sanrapang tau garring ta'ronang-ronanga sa'genna mate.

¹⁹Poko'-poko' kayu lammantanga sike'de' mami, sa'genna manna ana' ca'dia akkulle tonji narekeng jaina.

²⁰Nia' sallang nanarapi' wattunna, na anjo bansa Israel niaka tassesa tenamo nalanapappirannuang kalenna mae ri bansa koasaya mae ri ke'nanga, sattika ampaccappuki ke'nanga, passangalinna napappirannuangi sarenna mae ri Batara, Allata'ala matangkasa'na Israel.

²¹Bansa Israel niaka sike'de' tassesa latobaki mae ri Allata'ala kaminang porea.

²² Manna pole kamma-kamma anne sangkamma jaina kassika ri tamparang anjo jaina tu Israel, mingka siapa are mami jaina lammotere'. A'reppese'mi hukkunganNa Batara, na memang siratangi siagang adeleki punna nipanraki anjo bansaya.

²³Iyo, sikontu pa'rasanganga laniancuruki ri Batara Kaminang Makoasaya; iaminjo kaputusanNa Batara, siagang takkulleami nipinra anjo kaputusanga.

²⁴Nakana Batara Kaminang Makoasaya mae ri umma'Na ammantanga ri Sion, “Teako mallakki mae ri tu Asyur, manna pole najallakkangko siagang nasessako ke'nanga kamma nagaukanga tu Mesir riolo.

²⁵Sinampe'ji nammari larroKu mae ri kau, nampa Kuancuru' anjo ke'nanga.

²⁶INakke, Batara Kaminang Makoasaya, lancamboki ke'nanga siagang cambo', kamma le'ba'na Kupangngajari tu Midian ri bulu' batu Oreb. LaKuhukkungi Asyur, sangkamma le'ba'na Kuhukkung Mesir.

²⁷Anjo wattua laKulappassangko battu ri panjallakkanna Asyur, nampa tenamo nakoasa ke'nanga mae ri kau.”

²⁸Naempoimi tantara Asyur kota Ayat. Nalaloimi ke'nanga Migron! Bokonna ke'nanga naboliki ri Mikhmas!

²⁹Allalomi ke'nanga ri pa'limbangnganga siagang a'bangngi ke'nanga ri Geba! Annekkere'mi pandudu'na kota Rama, siagang larimi pandudu'na Gibea, kotana Saul.

³⁰Ammarrang mako he, pandudu'na Galim! Pilangngeri, he pandudu'na Laisya! Appiali mako pandudu'na Anatot!

³¹Larimi pandudu'na Madmena siagang Gebim.

³²Anne alloa nia'mi musua ri kota Nob, siagang anjoremmi ke'nanga ampanaiki panja'guru'na mae ri Bulu' Sion, mae ri kota Yerusalem.

³³Batara Kaminang Makoasaya laNaruntungi anjo ke'nanga, rapang tangke kayu nite'baka battu ri poko'na. Kaminang porea siagang kaminang tinggia ri ke'nanga lanipolongi siagang laniruntungi.

³⁴LaNarumbangi Batara ke'nanga rapang poko' kayu ri tangngana romang nita'bang siagang pangkulu'. Manna pole nakassa' ke'nanga rapang poko' kayu kaminang hebaka ri Libanon, mingka larumbang tonji ke'nanga!