Read Makassar Version – KITTA' MATANGKASA YESAYA 11 Bible Online

YESAYA 11 - Makassar Version – KITTA' MATANGKASA bible

YESAYA 11

¹ Turunganna Karaeng Daud rapangi poko' kayu le'baka nita'bang. Mingka sanrapang attimbona pole cu'la' berua battu ri tonasa'na, kamma tomminjo lania' sitau karaeng lammumba battu ri turunganna Daud.

²KoasaNa Batara langngului, ampa'jari baji' akkalaki siagang cara'deki, porei angngalle kaputusang nampa nagaukang; angngassengi ero'Na Allata'ala siagang mappilangngeri ri Ia.

³Mangngaina iamintu mannurukia ri Batara. Tena naporo naadelinaja bawang taua natanapilajaria rolong, yareka lanri kana-kana napabattua taua.

⁴ Tu kasi-asia naadeli siagang adele', tau tamakkullea nabantui siagang lambusu'; nahukkungi tau salaya lanri parentana, tau ja'dalaka natumpassangi.

⁵ Adeleki siagang majarreki angngalle tindakang lalang sikamma apa-apaya.

⁶ Lasipammantangangi serigalaya siagang gimbalaka, macanga lanra'bai ri sa'rinna bembea. Ana' sapia la'rukuki siagang ana' singaya, siagang ana'-ana' ca'di langngembai ke'nanga.

⁷Sapia lasipangnganreangi ruku' siagang beruang, ana'-ana'na lasikatinroangi. Singaya langnganrei rarame sangkamma sapi.

⁸Ba'lalo ana' loloa talangngapayai punna akkarena ri ampi'na ulara' a'racunga.

⁹ Ri Sion, Bulu'Na Allata'ala Matangkasaka, tena tau ja'dala' yareka ammanraki. Rassi pa'rasanganga siagang pangngassengang ri Allata'ala, rapang je'ne' ampirassi tamparanga.

¹⁰ Nia' sallang se're wattu nalabattu sitau karaeng turunganna Daud, a'jari tau niparhatikang ri sikontu bansaya. Labattui ke'nanga mae ri ia, siagang sanna' nipakalompona pammantanganna.

¹¹Anjo alloa laNapakei pole sikalipa kakoasanNa Batara siagang Naerang umma'Na niaka tassesa battu ri Asyur siagang battu ri Mesir, ri pa'rasangang-pa'rasangang Patros, Sudan siagang Elam, ri Babel, Hamat siagang pulo-pulo bellaya.

¹²Lappanaiki Batara se're bandera untu' bansa-bansaya. Iaminjo pammatei angkanaya laNapasse'rei ammotere' bansa Israel siagang Yehuda ia tassiaraka mae ri sikontu buttaya, nampa naerang ke'nanga ammotere'.

¹³Tenamo nalangngiri mata kakaraenganna Israel mae ri Yehuda, siagang Yehuda tenamo nanamusui Israel.

¹⁴Lassamai ke'nanga ambunduki tu Filistin ri bageang ilau' siagang anrampasaki bansa-bansa bageang irayaya. Lanapatunduki ke'nanga bansa Edom siagang Moab, siagang bansa Amon latundu' tongi mae ri ke'nanga.

¹⁵ LaNakalotori Batara tamparang Tarrusu'na Suez. Lappareki anging bambang, ammirika sa'genna Binanga Efrat a'jarimi tuju kaloro' ca'di sike'deka je'ne'na, sikontu taua allimbangi natanapasuluka sandala'na.

¹⁶Lania' agang lompo untu' lanaolo umma'Na tassesaya assulu' battu ri Asyur, sangkamma wattunna assulu' Israel battu ri Mesir.