Read Makassar Version – KITTA' MATANGKASA YESAYA 14 Bible Online

YESAYA 14 - Makassar Version – KITTA' MATANGKASA bible

YESAYA 14

¹LaNakamaseangi Batara Israel umma'Na, siagang Napilemi ke'nanga a'jari taunNa. LaNaboliki ammotere' ke'nanga ri pa'rasangang kalenna. Bansa maraenga labattu nampa asse're siagang ke'nanga.

²Jai bansa lantulungi bansa Israel untu' ammotere' mange ri pa'rasangang Napassareanga Batara mae ri ke'nanga, anjoreng, anjo bansa-bansa maraenga la'jari atai mae ri tu Israel. Lanatahangi tu Israel tau le'baka antahangi ke'nanga, siagang lanaparentai tau le'baka anjallakkangi ke'nanga.

³LaNapata'lappasaki Batara bansa Israel battu ri kapa'risanga siagang kasessanga, siagang battu ri jama-jamang battala' nipassaya mae ri ke'nanga.

⁴Punna Nagaukammo Batara anjo kammaya, lanacau-caumi ke'nanga karaeng Babel, angkana, “Tu'guru'mi karaeng pallaka! Takkulleami anjallakkang.

⁵Napa'le'ba'mi Batara pamarentahanna sikamma pamarenta ja'dalaka,

⁶larroa anjallakkangi bansa-bansaya siagang tulusu' ansessayai ke'nanga.

⁷Kale'bakkanna laamammi siagang sannammi sikontu linoa, na massing akkelong rannumo taua.

⁸Poko' eru siagang poko' camara Libanon larannumi lanri tu'guru'mi anjo karaeng pallaka, ri wattunna a'lampamo tenamo tau lassuro ta'bangi ke'nanga!

⁹Assua'-suara'mi lino tau matea anruppai kabattuanna anjo karaeng Babel. Ambangummi sikamma nyawa tau koasaya riolo ri lino, siagang nyawana sikamma karaenga riolo ambangung tommi battu ri empoang kala'biranna ke'nanga.

¹⁰Akkio' ngasemmi ke'nanga ri ia, angkana, ‘He! Kamma-kamma anne sangkamma mako ikambe, lamma siagang tena kullenu!

¹¹Riolo ikau nipakala'birikko siagang sa'ra kacapi, mingka kamma-kamma anne nia' mako ri kasinoanna lino tau matea. Olo' la'jari katinroannu siagang gallang-gallang la'jari kalimbu'nu.’

¹² He karaeng Babel, riolo ikau bintoeng bari'basa' accayaya, mingka kamma-kamma anne tu'guru' mako battu rate ri langika! Riolo nubetai bansa-bansaya, mingka kamma-kamma anne nipasambilamako ri buttaya.

¹³ Appattujuangko nai' ri langika siagang nupadongko' empoang kala'birannu irate ri bintoeng kaminang tinggia! Nupikkiriki angkana akkulleko ammempo salaku karaeng irate ri moncong bageang wara', tampa'na sikamma rewataya a'rappungang.

¹⁴Nukana, angkana ikau lanaikko ri rammang tinggia nu'jari sangkamma Kaminang Tinggia.

¹⁵Kale'bakkanna nipaloposokko antama' ri bageang kaminang lantanga ri lino tau matea.

¹⁶Ia ke'nanga tau niaka anjoreng lanacinikiko siagang lanajanjangko. Lakkuta'nangi ke'nanga angkana, ‘Iaka minne tau ampakamallaki buttaya siagang ampakagegereki sikamma kakaraenganga?

¹⁷Iakami angngancuruki kota-kotaya siagang ampinrai linoa a'jari parang kassi'? Iaka minne le'baka allappassangi sikamma tunitahanna yareka allappassangi ke'nanga ammotere'?’

¹⁸Sikontu karaeng le'baka ammarenta bansa-bansa nitarawangi siagang suara' massing ri jera'na ke'nanga,

¹⁹mingka ikau tena jera'nu; maya'nu nipelaki sangkamma cu'la' nipelaka, nitambungi ri sikamma maya'na pejuang matea lalang bundu', siagang nipasambilaya siagang ke'nanga antama' ri kali'bong batua, rapang maya' nionjo'-onjokanga.

²⁰Le'ba'mi nupanraki pa'rasangannu siagang nubuno bansa kalennu. Lanri kammana anjo tenamo nitarawangko kau sangkamma karaeng-karaeng maraenga. Tena manna sitau battu ri anjo kaluarganu ja'dalaka lanipasalama'.

²¹Lanipakaramulami pammunoanga! Ana'-ana' bura'nenu lamatei lanri dosana boe-boena ke'nanga. Tena manna sitau battu ri ke'nanga lammarenta ri lino yareka ambangung kota-kota.”

²²Nakana Batara Kaminang Koasaya, “LaKubakkai Babel nampa Kupa'lanynya'. Tena manna sitau laKupasalama', ba'lalo manna ana'-anaka tena laKulappassang attallasa'. INakke Batara anne, akkana.

²³LaKupa'jari kollangi Babel, napammantangngi kokoci'. LaKubarrasaki Babel sa'genna tangkasa'. INakke, Batara Kaminang Makoasaya anne a'bicara.”

²⁴ Assumpai Batara Kaminang Makoasaya angkana: “Ia le'baka Kurancanakang mattantu lakajariangi.

²⁵Tu Asyur niaka ri Israel pa'rasangangKu, laKupanraki, na ia niaka ri moncong-moncongKu laKuonjo'-onjokangi. LaKupakabebasaki bansaKu battu ri panjallakkanga siagang battu ri erangngang battala' napassakanga bansa Asyur.

²⁶Kammaminne rancanaKu untu' linoa; limangKu laKupajonjoi untu' anghukkungi bansa-bansaya.”

²⁷Le'ba'mi Natappuki Batara Kaminang Makoasaya untu' laNagaukang kammaya anjo. LaNapajonjoi limanNa untu' assare hukkungang, siagang tena manna sitau akkulle ampisangkai.

²⁸ Iaminne pasang nipa'la'banga nipau ri taung kamateanna Karaeng Ahas.

²⁹ He bansa Filistin, tepo'mi palu-palu eroka nipake untu' ampalu-paluiko. Mingka teako rannui, lanri punna nia' ulara' mate, nia' labattu ulara' maraeng, la'bi sekkeka, untu' ansambeangi, siagang bayao ulara' bo'boka a'jari naga akka'nyi'.

³⁰Lanitujuko ri kacipurang lompo, na sikamma tau ammantanga tassesa lanibuno ngasengi. Kabalekanna, tau kaminang kasi-asia battu ri umma'Na Batara langgappai kanre, siagang tau tenaya kullena lattallasaki siagang amang na salewangang.

³¹Appiraung mako, siagang ammarrang mako appala' tulung, he kota-kota Filistin! Siratangko gegere' ngaseng napakamma malla'! Rammang limbu'buka naiki battu wara' a'jari pammatei ri kabattuanna musua; tena tau ballorang ri ke'nanga.

³²Apa lanipappialiang mae ri sikamma tunisuroa battu ri bansa Filistin? Lanikana ri ke'nanga angkana le'ba'mi Nabangung Batara kota Sion, siagang umma'Na sessaya lanijagai anjoreng.