Read Makassar Version – KITTA' MATANGKASA YESAYA 16 Bible Online

YESAYA 16 - Makassar Version – KITTA' MATANGKASA bible

YESAYA 16

¹Battu ri kota Sela ri parang lompoa, akkiringi bansa Moab ana' gimbala' mange ri tukoasaya ri Yerusalem, a'jari hadia.

²Attayangi tu Moab ri birinna Binanga Arnon nampa lingu pitijappa-jappai, rapang jangang-jangang nibongka battu ri ru'munna.

³Nakana ke'nanga mae ri Yehuda, “Paumi apa musti nagaukang ikambe. A'jari mako pa'la'langang mae ri kambe ri wattu bambanna alloa, siagang lappassammi ammantang ikambe lalang ri la'langannu. Ikambe anne tau lariki; cokkoi ikambe siagang teako alle bokoi ikambe.

⁴Saremi ikambe ising annumpang ri pa'rasangannu. La'langimi ikambe mae ri tau eroka ampanraki ikambe.” (Panjallakkanga siagang pammanrakia nia' kala'busanna, siagang sikamma tau angngancurukai siagang tau anjallakkangai pa'rasangang Israel lalanynyaki.

⁵Nampa nia' sitau turunganna Daud la'jari karaeng, na lanaparenta bansana siagang pangngamaseang tamamminraya. Lanapaentengi kaadelanga siagang langngallei linta' tindakang untu' anggaukangi katojenganga.)

⁶Nakanamo bansa Yehuda, “Nalangngere'mi ikambe antekamma kaborroanna bansa Moab. Naassengi ikambe angkanaya anjo ke'nanga tampoi siagang tinggi langgai. Bicaranna ke'nanga sangnging bicara kosong, tena bonena.”

⁷Lanri kammana anjo, lappassammi anjo bansa Moab sikarruki. Lappassammi ke'nanga angngarru' punna nau'rangi kanre nyamang biasaya nakasia' ke'nanga ri wattunna nia' ri kota Kir-Hareset. Lappassammi ke'nanga tappu' minasa siagang akkunrareng.

⁸Sikamma koko niaka ri ampi'na Hesybon siagang sikamma koko anggoro' Sibma le'ba'mi nipanraki, koko-koko biasaya a'rappo anggoro' kaminang baji' mae ri tukoasana bansa Moab siagang ansa'ringai ke'nanga. Riolo narapiki sa'genna kota Yaezer luara'na anjo koko-koko anggoroka; a'lampa anrai' narapiki sa'genna parang kassika, na bageang kalau' sa'genna ba'leanna Tamparang Matea.

⁹Kamma-kamma anne kukarrukimi poko' anggoro'na Sibma rapang angkarruki Yaezer. Ammattiki je'ne' matangku lanri Hesybon siagang Eleale, lanri wassele' buttana la'busu'mi nikanre ri musua.

¹⁰Tena manna sitau rannu ri sikamma anjo koko copponga. Tenamo manna sitau akkio' rannu yareka akkelong-kelong ri koko anggoroka. Tena tau ammacco' anggoro' untu' appare' je'ne' anggoro'. Kupammarimi kio' rannuna ke'nanga.

¹¹Ammarrangi kusa'ring siagang ancuruki pa'maikku anciniki sarenna Moab siagang Kir-Heres.

¹²Sanna'mi ballasa'na tu Moab angngambi' nai' ri bulu' tampa' pakkoro'bangnganga untu' appala' doang, mingka tena apa-apa wassele' nagappa ke'nanga.

¹³Iaminjo pappasang Napassareanga Batara riolo ri passala'na Moab.

¹⁴Na kamma-kamma anne Nakana Batara, “Ganna' tallun taung pole sallang, sikontu pakkalumanynyangngang nakalompoang pa'maika tu Moab lalanynya' kabusuki. Anjo ra'ya'na jaia, la'jari sike'de' mami siagang lammami.”