Read Makassar Version – KITTA' MATANGKASA YESAYA 17 Bible Online

YESAYA 17 - Makassar Version – KITTA' MATANGKASA bible

YESAYA 17

¹ Nakana Batara, “Tenamo nala'jari kota anjo Damsyik, mingka la'jari pannambungang loro mami.

²Lanibokoimi kota-kota niaka ri Siria sa'genna satunggu-tungguna, siagang la'jari mami pammantangngang olo'-olo'; tena manna sitau lambongkai ke'nanga.

³Tenamo la'jari pajaga mae ri Israel nampa Damsyik latappela'mi kabebasanna. Tu Siria niaka ija tassesa la'jari hinai lalang tallasa'na sangkamma tu Israel. INakke, Batara Kaminang Makoasaya, anne le'ba' akkana kamma.”

⁴Nakana Batara, “Nia' wattunna sallang, nalalanynya' kalompoanna siagang kacopponganna tu Israel.

⁵Anjo Israel lasanrapangi koko ri Refaim cappuka le'ba' nikatto gandunna, na sike'de' mamo tassesa.

⁶Rapang poko' zaitun cappuka nialle rapponna, na piram batu mami ammantang ri cappa'-cappa' tangkenna, kamma tomminjo bansa Israel, sike'de' mami lasalama'. INakke, Batara Allata'alana Israel, anne akkana.”

⁷Anjo wattua sallang, lammotere'mi taua mange appala' tulung ri Mappa'jarina, iamintu Allata'ala matangkasa'na Israel.

⁸Tenamo nalamanrannuang pole ke'nanga ri wassele' bate pare' kalenna ke'nanga, iamintu ri tampa'-tampa' pattunuang dupana, siagang patung-patunna rewata baine niarenga Asyera.

⁹Anjo wattua sallang, sikamma kota-kota kassaka pattahanganna ri Israel la'jari rumbangngang mami siagang la'jari sinomi, sangkamma kota-kota le'baka nabokoi tu Hewi siagang tu Amori ri wattunna lari ke'nanga battu ri tu Israel.

¹⁰O, Israel, nukaluppaimi Allata'ala le'baka ampasalamakko siagang alla'langiko sanrapang moncong batu kassaka. Kabalekanna, nulamungimi kokonnu untu' rewata-rewataya.

¹¹Mingka manna pole naccu'la' memang siagang a'bunga memang ri allo nulamunna, mingka tena nalanugappa wassele'na. Ia lanugappaya iamintu poro kasusaang siagang kapa'risang bawang, tenaya nakkulle tappela'.

¹²Para gegere'mi sikamma bansa kassaka; ammarrummi sa'ranna rapang arrunna bombang lompoa.

¹³Majui ke'nanga rapang a'ba sannaka lompona. Mingka Niancangi ke'nanga ri Allata'ala, nampa lari ke'nanga sa'genna bella lampana. Niondangi ke'nanga rapang awang niri'bakang ri anging nai' ri buluka, yareka rapang limbu'bu' nitui' ri anging lompoa.

¹⁴Ri wattu karuenna appakamalla' lompoi ke'nanga, mingka ri bari'basa'na tenami ke'nanga. Iaminjo rapanna sarenna sikamma tau arrampasakai apa-apanta.