Read Makassar Version – KITTA' MATANGKASA YESAYA 18 Bible Online

YESAYA 18 - Makassar Version – KITTA' MATANGKASA bible

YESAYA 18

¹ Battu ba'le ri se'reang pa'rasangang ba'leanna binanga-binanga Sudan, nia' kalangngerang sa'ra kape'-kape'na olo'-olo' anri'babaka.

²Nia'mo siapa are suro battu ri anjo pa'rasanganga a'limbang ri Binanga Nil, lalang ri biseang-biseang pandanga. He, sikamma suro laccirika ngaseng, ammotere' mako linta' mange ri pa'rasangannu napanumaloia sikamma anjo binangaya. Angngerang mako se're pasang mae ri anjo bansanu makassaka siagang barania, sikamma taunnu tinggi-tinggia ngaseng siagang alusuka bukkulenna, kammayatompa nikamallakkanga ri sikontu linoa.

³He, ikau ngaseng niaka empo ri lino! Parhatikangi punna nipanai'mo sikamma banderaya ri coppo'na sikamma monconga!

⁴Nakana Batara mae ri nakke, “Battu irate ri pammantangangKu, laccinikKa' naung siagang sannang na singara', kamma sannanna saliu' ri wattu bambanna bangngia lalang wattu pakkattoang, kamma singara'na alloa ri wattu singaraka.

⁵Ri tenanapa nawattu rappo-rappoang, ri wattu runannamo bunganna siagang ri tenanapa nati'no' anggoroka ri poko'na, laniancuru'mi Sudan ri musunna, kamma gampanna ladinga angkattiliki tangke-tangkenna anggoroka battu poko' anggoroka.

⁶Lanibokoi sikamma maya'na tantarana, a'jari kanrena jangang-janganga ri wattu timoro', siagang kanrena olo'-olo' sekkeka ri wattu dinginga.”

⁷Nia' sallang se're wattu nanipassareang passarea battu ri anjo pa'rasangang nilaloia ri sikamma binangaya mae ri Batara Kaminang Makoasaya, battu ri bansana makassaka siagang barania, battu ri sikamma tau tinggia siagang alusuka kalenna na nikamallakkanga ri sikontu linoa. Labattu ngasengi ke'nanga mange ri Bulu' Sion, ri tampa'Na Batara Kaminang Makoasaya nisomba.