Read Makassar Version – KITTA' MATANGKASA YESAYA 23 Bible Online

YESAYA 23 - Makassar Version – KITTA' MATANGKASA bible

YESAYA 23

¹ Iaminne pappasang ri passala'na Tirus. He, sikamma pakappalaka ri Tarsis ansombaliai tamparang lompoa, appiraung mako! Ri wattunnu assombala' ammotere' battu ri Siprus, lanipauang mako angkanaya ancuru'mi Tirus. Pa'labuannu siagang sikamma balla'nu a'jari rumbangang ngasemmi.

²Akkunrareng mako, he pandudu'na biring tamparanga, sikamma padangganna Sidon! Saba' biasaya akkiringko tau anta'leang tamparang untu' a'balu' siagang ammalli gandung Mesir kammayatompa andanggang siagang sikontu bansaya.

⁴He kota Sidon, tappela'mi kalompoannu! Tenamo naakuiko tamparang lantanga, na nakana, “Tena le'baka' ammana', tena le'baka' appakalompo ana' bura'ne yareka ana' baine.”

⁵Ba'lalo manna tau Mesirka lata'bangka tongi siagang a'jari gegereki punna nalangngereki angkana le'ba'mi niancuru' Tirus.

⁶Appiraung mako siagang lari mako mange ri Tarsis, he pandudu' niaka ri biring tamparanga.

⁷Ciniki kotanu Tirus, ia niaka memammo battu ri jammang riolo. Iaka minne kota biasaya assannang-sannang? Iaka minne kota akkiringa tau anta'leang tamparang untu' mange a'danggang anjoreng?

⁸Sai sikamma padangganna sangnging bija karaeng kaminang nipakalompoa ri lino? Inaika angngalle kaputusang untu' antu'gurangi Tirus, anne kota kaminang koasaya?

⁹Batara Kaminang Makoasaya, Iami angngalle kaputusang kamma anjo. Ia antappuki untu' ampa'le'baki kaborroanna pandudu'na mae ri sikamma wassele' le'baka nagappa ke'nanga, siagang napakatuna sikamma tau kaminang malompoa ri lino.

¹⁰A'lampamako mange anjamai kokonnu, he pandudu'na Tarsis, saba' tenami papparekang kappala'nu.

¹¹Naangka'mi Batara limanNa irateanna tamparanga siagang Nagulummi sikamma kakaraenganga. Assaremi parenta sollanna niancuru' sikamma benteng pattahanganna Funisia.

¹²Nakana Batara, “He, kota Sidon! Tenamo nulassannang-sannang pole. Nijallakkammi pandudu'nu. Manna pole nalari ke'nanga mange annompang ri Siprus, tena todong nalaamang ke'nanga.” (

¹³Teai bansa Asyur, passangalinna bansa Babel allappassangi olo'-olo' sekkeka angkoasai Tirus. Iatommi ke'nanga ampaentengi sikamma menara untu' nipake antammulili balia, anruntungi sikamma benteng pattahanganna siagang ampa'jari rumbangangi anjo kotaya.)

¹⁴Appiraung mako, he sikamma pakappalaka! Le'ba'mi niancuru' kota nupattoanga.

¹⁵Lanarapiki sallang wattunna nanikaluppai Tirus sa'genna tujupulo taung sallona, sangkamma jaina umuru'na karaenga. Punna allalomo anjo wattua, lasanrapammi Tirus sitau baine pagau' sala, natabaya kelong angkanaya:

¹⁶Angngalleko kacapi, kulilingi kotaya, he baine pagau' sala cilaka nikaluppaia! Ko'biki kacapia, akkelong mako pole, sollannu niu'rangi ammotere'.

¹⁷Le'baki anjo tujupuloa taung, laNau'rangimi Batara anjo Tirus siagang nikellaimi anggaukangi ammotere' jama-jamanna rioloa. La'danggammi ammotere' siagang sikontu kakaraenganga ri lino.

¹⁸Passawallang siagang gaji nagappaya talanabolikai, mingka lanapassareangi mae ri Batara. Sikamma tau anynyombaya mae ri Batara lanapakei anjo doeka untu' ammalli care-care siagang kanre naparalluanga ke'nanga.