Read Makassar Version – KITTA' MATANGKASA YESAYA 25 Bible Online

YESAYA 25 - Makassar Version – KITTA' MATANGKASA bible

YESAYA 25

¹Batara, iKatte Allata'alaku, kupakala'birikKi' siagang kupuji arenTa. Saba' sikamma bate pa'jariTa tamaka appakalannasa'na; le'ba' Kirancana memangi battu riolo, naKimmajarre' anggaukangi.

²Anjo kotaya le'ba'mi Kiancuru'; kota niaka balla' pattahanganna a'jari rumbangang. Balla' lompo nabangunga bansa maraenga cappu'mi, na tena nalanibangung poleang satunggu-tungguna.

³LanipujiKi' ri bansa-bansa makassaka, siagang lanikamallakkangKi' ri kota-kotana sikamma bansa pallaka.

⁴Saba' iKattemi palararianna tau lammaya, tampa' amanga mae ri tu kasi-asia lalang kasukkarranga. IKattemi pa'la'langngang battu ri anging lompoa, pa'la'langngang battu ri bambanna alloa. Saba' tau pallaka a'bakkai rapang anging lompo ri wattu bara',

⁵rapang anging bambang ri butta kalotoroka. Mingka iKatte antongkoki bawana musunna ikambe, Kipamari ammarranna sikamma tau pallaka, rapang la'lang rammang ampakadingingi bambang alloa.

⁶Ri Bulu' Sion, lappasadiai Batara Kaminang Makoasaya parjamuang untu' sikontu bansaya ri lino. Appatalai kanre kaminang nyamanga siagang anggoro' nipilea.

⁷Irate ri anjo buluka laNapa'lanynyaki rammang kasi'nanga niaka antongkoki bansa-bansaya.

⁸ LaNaancuruki Batara Kaminang Makoasaya anjo kamateanga sa'genna satunggu-tungguna! LaNasapui sikamma je'ne' mataya battu ri rupaya, siagang Napakabella kahinanga ia natanggonga umma'Na ri sikontu buttaya. Batara anne le'ba' akkana kamma, na mattantu lakajarianna anjo passalaka.

⁹Anjo wattua lanakana taua, “Sikontutojenna, Iami Allata'alata; Iami nitayanga, sollanta Napasalama'. Tojeng, Iaminne Batara; Iami nitayanga. Anne kamma akkio' rannu maki', saba' le'ba' maki' Napasalama'.”

¹⁰ LaNajagai Batara Bulu' Sion, mingka tembo' pattahanganna Moab lanaonjo'-onjokangi rapang rarame ri tampa' loroa.

¹¹Pandudu'na lanapaka'rangi limanna sangkamma tau eroka a'lange. Mingka Batara laNapakatunai katampoanna ke'nanga sa'genna tena pakkullena ke'nanga.

¹²Sikamma tembo' pattahanganna Moab siagang tembo'-tembo' tinggina ke'nanga lanirumbangi nampa nipatappasa' naung ri buttaya sa'genna ancuru' sangkamma limbu'bu'.