Read Makassar Version – KITTA' MATANGKASA YESAYA 26 Bible Online

YESAYA 26 - Makassar Version – KITTA' MATANGKASA bible

YESAYA 26

¹Anjo wattua lanakelongangi taua anne kelonga ri butta Yehuda: “Tamaka kassa'na kotata; KalenNa Allata'ala ambangungi pattahanganNa, anrinni lasalamakki'.

²Sungkei sikamma pakke'bu' lompoa, sollanna antama' bansa tamamminraya, bansa anggaukangai ero'Na Allata'alana.

³O, Batara, iKatte assare passiamakkang siagang salewangang mae ri tau jarreka pa'mai'na, lanri tappa'na mae ri Katte.

⁴Tuli tappa' mako mae ri Batara, saba' Karaeng Allata'ala tuli anjagaiki'.

⁵Napakatunai Batara tau tampoa; Naancurukui kota pattahanganna ke'nanga, na Napasilappara' siagang buttaya.

⁶Sikamma tu kasi-asia siagang tau pa'risika langngonjo'-onjokangi.”

⁷Tau lambusuka pa'mai'na a'jappai ri oloang lambusuka, saba' iKatte, Batara, amparekangi oloang.

⁸Mannuruki ikambe ri kaputusanTa, o Batara, siagang mattayang-tayang ri Katte; iKattemi napuji siagang nakanakkukang atinna ikambe.

⁹Punna bangngi, nakkuki nyawaku mae ri Katte, punna bari'basa' mattayangi atingku. Punna sallang Kiadeli buttaya, lanaassemmi pandudu'na linoa apa annabaya.

¹⁰Manna nabaji' nigaukang ri tau ja'dalaka, tena todong napappilajari apa annabaya. Manna ri pa'rasangang niaka hukkunna jekkong tonji gau'na, na taeroka angngakui koasaNa Batara.

¹¹ O, Batara, sadia maKi' langhukkungi musunTa, mingka tanaassengai kalenna ke'nanga. Lappassammi ke'nanga ammakkala' kacci anciniki pangngamaseanTa mae ri ummatTa. Lappassammi ke'nanga cappu' niancuru' ri hukkungang Kisadiakanga mae ri ke'nanga.

¹²O, Batara, iKatte lampa'jari salewangangi ikambe; sikontu najamaya ikambe, iKattemi anggaukangi untu' ikambe.

¹³Le'baki ikambe nikoasai ri karaeng-karaeng maraeng, mingka iKatteji bawang naakui ikambe, o, Karaeng Allata'alana ikambe!

¹⁴Matemi ke'nanga siagang tenamo nalattallasa' poleang, talambangungami ammotere' rohna. Saba' cappu'mi ke'nanga le'ba' Kiancuru' siagang Kipela' ri pangngu'ranginTa.

¹⁵Le'ba'mi Kipa'lappi-lappi jaina ummatTa, o Batara, Kipa'jari luara' daerana ikambe, lanri kammana anjo iKattemi nipakala'biri'.

¹⁶Le'ba'mi Kihukkung ikambe; lalang ri kasukkarrang a'gilingi ikambe mae ri Katte, siagang appala' doang mae ri Katte, o Batara.

¹⁷Rapang baine lamanaka ammulissara' siagang ammarrang napakamma pa'risi', kammaminjo ikambe ri dallekanTa, o Batara.

¹⁸Rapangi tau tianang ikambe, ammulisara' napakamma pa'risi', mingka tena apa-apa nalassukang ikambe; tena kasalamakkang napassareang ikambe mae ri linoa, tena todong natambai ikambe pandudu'na.

¹⁹UmmatTa mateamo lattallasa' poleangi ammotere', sikamma maya'na ke'nanga lambangungi ammotere'. Tau le'bakamo nitarawang lalang ri buttaya lambangung poleangi siagang akkio' rannu. Rapang saliu' ampakkamalei buttaya, Kipattallasaki ummatTa salloamo le'ba'na mate.

²⁰Antama' mako ri balla'nu, he bansaku, nampa nutongko' pakke'bu'nu. Accokko mako untu' sinampekang, sa'genna ammari larroNa Batara.

²¹Laturungi Batara battu ri pammantanganNa ri suruga untu' anghukkungi linoa siagang pandudu'na lanri dosana ke'nanga. Pammunoang le'baka nagaukang cokko-cokko ke'nanga lanisungke ngasengi. Tenamo nalanitongko' ri butta sikamma tau mate nibunoa.