Read Makassar Version – KITTA' MATANGKASA YESAYA 3 Bible Online

YESAYA 3 - Makassar Version – KITTA' MATANGKASA bible

YESAYA 3

¹Sitojenna, laNaalle ngasengi Batara Kaminang Koasaya sikamma parsadiaang kanrea siagang inunganga battu ri Yerusalem siagang Yehuda. Kammayatompa sikamma tau napattoanga ke'nanga:

²sikamma tubarania siagang tantaraya, haking, na'bi, patappu bicara siagang tumappakainga',

³perwira, tunipare' tutoaya siagang tummarentana, pabale'-bale' mata siagang pacini'.

⁴LaNaangkaki Batara ana'-ana' rungkaya a'jari pamimping ra'ya', nampa lappaero'-ero' ke'nanga ammarenta.

⁵Lamassing sijalla'-jallakkangi taua. Tau rungkaya tanajampangiai tau toaya, siagang tau ca'dia tanajampangiai tau lompoa.

⁶Anjo wattua lanakana taua mae ri se'rea bijanna: “Ikauji bawang nia' pakeannu siratang; jari ikaumo a'jari pamimping mae ri kambe lalang ri anne jammang jaia susa.”

⁷Mingka lappiali anjo bijanna nakana, “Inakke teaiya' sanro! Tena todong kanreku siagang pakeangku. Teako suroia' a'jari pamimping bansa!”

⁸Tojeng, tu'guru'mi Yerusalem! Runtummi Yehuda! Saba' sikontu kana-kananna siagang panggaukanna naewai Batara siagang nabaliangi kakoasanNa.

⁹Sipa' borrona ke'nanga ampa'nassai kaja'dallanna ke'nanga. A'nassa-nassai ke'nanga doraka sangkamma tu Sodom riolo. Cilakami ke'nanga! Kalenna tonji ke'nanga ampabattui cilakaya mae ri kalenna.

¹⁰Nakana Batara, “Pabattui mae ri tau mannurukia ri Nakke angkana lamate'nei siagang lasalamaki ke'nanga. Lanakasia' bajiki ke'nanga wassele' posona.

¹¹Mingka cilakai tau ja'dalaka! Lanihukkungi ke'nanga kamma nigaukanga mae ri tau maraenga.

¹²UmmakKu lanijallakkangi ri tau nangaia a'gau' riba, siagang lanipaccoki ri tau nangaia ammacco' paranna tau. Lanipasala oloangi ummakKu ri sikamma pamimpinna sa'genna tanaassengamo ke'nanga oloang siratanga naolo.”

¹³Sadiami Batara untu' antuntuki siagang angngadeli umma'Na.

¹⁴Langngallei tindakang Batara salaku Haking mae ri sikamma pamimpinna umma'Na. Naia tuduhanNa Batara mae ri ke'nanga, iamintu: “Ikau ngasemmi angngellaki sikamma wassele' koko anggoroka; balla'nu rassi siagang barang nurampasaka battu ri tau kasi-asia.

¹⁵Angngapa nanujallakkang ummakKu siagang nupacco' tu kasi-asia? INakke anne, Batara Kaminang Tinggia siagang Kaminang Koasaya, a'bicara mae ri kau ngaseng.”

¹⁶Nakana Batara, “Teai sipato' borrona bai'-bainea ri Yerusalem! Sanna' lalena, nangai akkido kanynying siagang tampo sikali nicini' a'jappa. Napare'-pareki dakkana, a'rincing-rincingi ponto bangkenna.

¹⁷Mingka laKuhukkungi ke'nanga; larassi puru-puru ulunna ke'nanga siagang lanigondoloki.”

¹⁸Nia' se're wattu sallang naNaalle Batara sikamma anjo belo-belo niaka ri bai'-bainea ri Yerusalem, ia napattampo-tampoanga ke'nanga: passikko' ulu, ponto bangkeng, rante,

¹⁹ponto lima, pattongko' rupa,

²⁰bongong, jima'-jima' ri lima siagang ri aya',

²¹cincing siagang anting-anting ka'muru,

²²pakeang ga'ga untu' pa'gaukang, baju la'bu kapala', dompe',

²³baju nipisi', pakeang lenang, passikko' kallong siagang bongong la'bu.

²⁴Kamma-kamma anne ammakei ke'nanga minynya'-minynya' bau', mingka sallang la'rasa bottoki ke'nanga. Passikko' aya' alusu'na ke'nanga lanisambei siagang otere' kasara'. Ulunna ke'nanga ga'gaya uu'na lanigondoloki. Pakeang ga'ga-ga'gana ke'nanga lanisambei siagang pakeang kekke'-kekke'. Kamma-kamma anne ga'gai ke'nanga; mingka sallang a'jari kodimi tanja'na lanri le'baki nisitempele'.

²⁵Tu bura'nea, kammayatompa kassa'-kassaka, lamatei lalang bundu'.

²⁶Ri sikamma pakke'bu' lompona kotaya lasusai taua lanri kamateangi siagang lappiraungi, nampa kalenna anjo kotaya lasanrapangi baine nisolarri, ammempo naung ri buttaya.