Read Makassar Version – KITTA' MATANGKASA YESAYA 32 Bible Online

YESAYA 32 - Makassar Version – KITTA' MATANGKASA bible

YESAYA 32

¹Ciniki, nia' se're wattu sallang nammarenta se'rea karaeng siagang adele' na sikamma pamimping bansaya lanapajappai kaadelanga.

²Yangasenna ke'nanga lamassing la'jari rapang tampa' pa'la'langngang battu ri anging siagang barubua. Rapangi ke'nanga binanga a'lo'loroka ri parang kassika, rapang pa'la'langang batu lompo ri butta kalotoroka.

³Tau akkullea accini' talanatongkokai matanna, tau allangngereka lanaparhatikangi.

⁴Tau tenaya nasa'bara' riolo, lasa'bara'mi anggaukangi tindakanna siagang baji'mi pammahanna. Tau a'ga'gaka a'bicara labaji'mi batena a'bicara.

⁵Tau toloa tenamo nanipakalompoi, patipua tenamo nanikana lambusuki.

⁶Tau toloa kana-kana tolo napasulu' siagang kaja'dallang narancana. Apa-apa mamo nagaukang yareka napau, tuli nahinai Allata'ala. Tale'bakai nasare kanre tau cipuruka yareka nasare je'ne' inung tau turerea.

⁷Na ia patipua sangnging kaja'dallang nanawa-nawa siagang nagaukang. A'boyai akkala' untu' ancilakai tau kasi-asia, iamintu a'boyai kana balle-balle siagang narompai ke'nanga anggappai ha'na.

⁸Mingka tau la'birika akkala' baji'na, la'biriki apa-apa narancanakanga siagang la'biri' tongi tindakanna.

⁹Pilangngeri, he sikamma baine nyamanga katallassanna, bellaya battu ri kasusaanga!

¹⁰Kamma-kamma anne akkulleko amang pakkasia'nu, mingka sitaung labattua latappu' minasako, lanri tanjariai rappo anggoroka, kammayatompa wassele' lamung-lamung maraenga tena todong.

¹¹Sa'genna kamma-kamma anne nyamangko ri tallasa'nu, bellako ri kasusaanga. Mingka kamma-kamma anne, annekkere' mako napakamma malla'! La'gasi pakeannu nampa nupasikko' kaeng karunga mae ri aya'nu.

¹²Karrukimi sikamma koko copponnu siagang sikamma koko anggoro'nu roasaka rapponna,

¹³saba' buttana bansaku nitimboi ri rompo' siagang katinting. Iyo, karrukimi sikamma balla'nu nupattampakia assannang-sannang siagang kota rassia kasuarrang!

¹⁴Ba'lalo balla' lompoa lanibokoi siagang ibukota suaraka la'jari sinoi. Buluka siagang sikamma menara tampa' pa'jaganga le'ba'mi nipasillappara' siagang butta sa'genna satunggu-tungguna. Sikamma keledai liaraka siagang gimbala' liaraka la'lemereki mange-mange a'ruku' anjoreng.

¹⁵Mingka sikalipi pole labattu Allata'ala siagang koasaNa. Na sikamma parang luaraka la'jari koko-koko coppong, sikamma kokoa la'jari sangkamma romang jaina.

¹⁶Ri sikontu pa'rasanganga lania' kalambusang siagang kaadelang.

¹⁷Tunggala' taua lanagaukangi apa annabaya, sa'genna nia' kasalewangang siagang kasannangngang sa'genna satunggu-tungguna.

¹⁸Lanipakabellai umma'Na Allata'ala battu ri kasusaanga nampa attallasa' ri tampa' sannanga siagang amanga.

¹⁹Tamaka mate'nena ngaseng nukasia' lanri ganna'na je'neka untu' lamung-lamunnu, olo'-olo' piaranu la'rukuki kemae-kemae siagang amang. Mingka musunnu lasanrapangi romang nitujua ri bosi batu; kotana ke'nanga laniruntungi.