Read Makassar Version – KITTA' MATANGKASA YESAYA 33 Bible Online

YESAYA 33 - Makassar Version – KITTA' MATANGKASA bible

YESAYA 33

¹Cilakai sikamma musunta! Angngellaki ke'nanga, manna pole tena naniellaki, angngalle bokoi, manna pole tenaja nialle bokoi. Mingka le'baki ke'nanga angngella' siagang angngalle boko, kalenna ke'nanga laniella' siagang lanialle boko.

²O, Batara, Kikamaseang laloi ikambe. IKattemi panrannuanna ikambe. Kijagai ikambe ri tunggala' alloa, siagang pasalamaki ikambe ri wattu kasukkaranga.

³Punna ammentengKi' naKipappilangngerang sa'ranTa a'gamarrunga, ma'nassa lalari bansa-bansaya tassimbung-simbung.

⁴Kamma pa'rappungang katimbang battu taua ambakkai siagang angngellaki ke'nanga.

⁵Batara sanna' mala'biri'Na; yangaseng-ngasenna Ia angkoasai. Ia ampaentengi hukkunga siagang kaadelanga ri Yerusalem

⁶siagang assarei kaamangngang umma'Na. Pa'barang-barangngang ampasalamakai ke'nanga iamintu kacara'dekang siagang pangngassengang kammayatompa mappakalompo ri Batara.

⁷Tau gammaraka siagang barania ammarrangi appala' tulung; sikamma tau nisuroa mange a'boya passiamakkang angngarruki napakamma si'na.

⁸Sikamma agang lompoa rassi bahaya, sa'genna a'jari sino; tena tau angngoloi. Tanirupaia parjanjianga siagang nitollaki passitujuanga. Tenamo nia' nijampangi.

⁹Nibokoimi pa'rasanganga a'jari sino. Ta'ronammi romang-romanna Libanon, sikamma ka'bunna Saron copponga a'jari sangkammami parang luara'. Ri Basan siagang ri Moncong Karmel ru'rusu'mi leko'-leko' kayua.

¹⁰Nakana Batara ri anjo bansaya, “Kamma-kamma anne lambangungA' siagang langngalleA' tindakang untu' ampappicinikangi kakoasangKu.

¹¹Rancananu sia-siaji, na sikamma nugaukanga tena ngaseng matu-matunna. Kalarroannu rapangi pepe' angkanreyai kalennu.

¹²Rapangko batu karang nitunua, lanipa'jari pa'leo'; rapang rompo' katinting nibattasaka nampa nitunu lalang ri pepeka.

¹³Boli'mi kamma tau a'reppeseka siagang tau bellaya nalangngereki apa Kugaukanga siagang naakui kakoasangKu.”

¹⁴Sikamma tau dorakaya ri Sion lannekkereki napakamma malla'. Nakana ke'nanga, “KaputusanNa Allata'ala rapangi pepe' a'rinraya sa'genna satunggu-tungguna. Maka nia' tau akkulle attahang lalang ri anjo pepe' appakaancuruka?”

¹⁵Akkulleko attahang punna akkanako nupanggaukang baji'. Teako a'boyai passawallang lanri nupacco'na tau kasi-asia, siagang teako annarimai doe' pammuccu'. Teako katuru'-turukangngi ri tau a'rancanaya pammunoang yareka kaja'dallang maraengannaya.

¹⁶Na lanijagai mako siagang laamang mako, rapang niakko lalang ri tembo' pattahangngang kassaka. Sadiai kanrea siagang inunganga untu' ikau.

¹⁷Nia' se're wattu sallang nanucini' se're karaeng ammarenta siagang accaya ri pa'rasangang niaka ri tompo'na buttaya.

¹⁸Kamallakkannu riolo mae ri pasussung simaya, pamarentaya siagang pajannang bansa maraenga, la'jari apa niu'rangi mami.

¹⁹Tenamo nulaccini' bansa maraeng tenaya nangngasseng atorang, a'bicaraya lalang bicara tena nupahangi.

²⁰Ciniki kota Sion, tampatta ampakalompoi pa'gaukang agamaya. Ciniki Yerusalem! Tamaka amanna anjo tampaka untu' nipammantangi, rapang kema le'baka nipalette', tenamo nalanibi'bu' patto'na siagang tenamo nalatappu' otere'na.

²¹LaNapappicinikangi Batara kala'biranNa mae ri katte. Lattallasakki' ri biring binanga luaraka, tenaya nakkulle nasombali musua.

²²Sikontu pakkakasa' niaka ri kappala'na ke'nanga tena ngaseng matu-matunna; sikamma sombala'na takkulleai nipaka'rang! Sikontu kakalumanynyanganna pasukang musua lanirampasaki, teai sipato' jaina, sa'genna manna tau pesoka anggappa ngaseng bageang. KalenNa Batara la'jari karaenta; Ia lammarenta, ampaentengi hukkunga siagang ampasalamakki' battu ri musua.

²⁴Manna sitau ri pa'rasanganta tania' lakkunrareng lanri garring, siagang sikontu dosana lanipammopporang ngasengi.