Read Makassar Version – KITTA' MATANGKASA YESAYA 34 Bible Online

YESAYA 34 - Makassar Version – KITTA' MATANGKASA bible

YESAYA 34

¹Umba kirappungang, he bansa-bansaya, pilangngerimi. Lappassammi nabattu ngaseng sikontu buttaya siagang sikontu niaka ammantang ri tompo'na, nampa appilangngeri.

²Larroi Batara mae ri sikontu bansaya siagang sikontu pasukanna ke'nanga. LaNahukkungi siagang laNaancuruki ke'nanga.

³Sikamma maya'na ke'nanga tena nalanitarawang, mingka nibalang parekangi sa'genna a'jari a'rasa siagang a'jari botto'. Sikamma monconga la'jari ejai lanri attalaka cera'na.

⁴ Mataalloa, bulanga siagang sikamma bintoenga laancuruki. Langika lanigulungi sanrapang gulungang karattasa'. Latu'guruki sikamma bintoenga rapang leko'-leko' kayu runanga battu ri poko' kayua.

⁵ Napasadiami pa'danNa Batara ri suruga, na kamma-kamma anne latattabami anjo pa'danga mae ri bansa Edom, le'baka nitappuki hukkunganna laniancuru'.

⁶Lattalaka ceraki pa'danNa Batara siagang larassi jannana ke'nanga, rapang cera'na siagang jannana olo'-olo' nikoro'bangkanga. Saba' appasadiai Batara koro'bang ri Bozra, siagang lajai tau Nabuno ri butta Edom.

⁷Lamatei taua rapang sapi liara' siagang sapi rungka. Laejai pa'rasanganna ke'nanga napakamma cera' siagang larassi siagang janna.

⁸Iaminjo wattunna na Naalleangang Batara Sion siagang Napa'balassang mae ri sikamma musu-musunNa.

⁹Sikamma Binanga Edom latappinrai a'jari tere', siagang buttana la'jari batu-batu a'bara. Kale'bakkanna sikontu pa'rasanganga la'rinrai kamma tere'.

¹⁰ Allo bangngi tamatea rinrana, na nai'mo umbuna satunggu-tungguna. Lanibokoi anjo buttaya a'jari kosong siagang kalotoro' ri sikontu turungang, na tena manna sitau langngoloi.

¹¹Kiti'balang siagang landa' lammantang anjoreng, kammayatompa kokocika siagang kalaa'. LaNapa'jari ricui siagang kosongi Batara anjo buttaya sangkamma tenanapa apa-apa nipa'jari.

¹²Tena karaeng lamparentai anjo pa'rasanganga, siagang sikamma pamimpinna lanynya' ngasemmi.

¹³Sikamma balla' rewatana siagang kota-kota niaka pattahanganna lanitimboi ri ruku' siagang rompo' katinting, nipammantangngi ri kongkong romang siagang jangang-jangang unta.

¹⁴La'lemereki olo'-olo' sekkeka anjoreng; jing assibalasa'-balasaki assa'ra, na jing bangngia a'boyai tampa' pammari-mariang.

¹⁵Ri anjo tampaka appare' ru'mung ulara' a'racunga, untu' a'bayao, anggoppoki bayaona, siagang amparakai ana'-ana'na. Jangang-jangang tarruka a'rappungi anjoreng, massing nia' sipasanna.

¹⁶Boyai siagang bacami lalang Kitta'Na Batara, niaka angkana: Tena manna se're anjo sikontu apa attallasa' nipa'jari latappela' yareka latena pasanganna. Saba' kammaminjo parentaNa Batara, siagang Ia KalenNa lampa'rappungangi ke'nanga.

¹⁷Batara ambagei anjo pa'rasanganga mae ke'nanga na massing natarima bageanna. Lammantangi ke'nanga anjoreng satunggu-tungguna, siagang anjo buttaya la'jari napatangi ke'nanga tulusu' mae ri turunganna ke'nanga.