Read Makassar Version – KITTA' MATANGKASA YESAYA 36 Bible Online

YESAYA 36 - Makassar Version – KITTA' MATANGKASA bible

YESAYA 36

¹Ri taung makasampulona anggappa' ri pamarentahanna Hizkia, karaeng Yehuda, kota-kota Yehuda niaka tembo' pattahanganna nibunduki siagang nibetai ri Sanherib, karaeng Asyur.

²Le'baki anjo nasuromi perwira tinggi tantarana battu ri Lakhis mange ri Yerusalem nirurungang ri tantara jai, untu' antuntuki sollanna mangaku nibeta Karaeng Hizkia. Battui ke'nanga ri anjo kotaya, angngallemi tampa' ri koko niarenga Koko Pasassa, ri ampi'na solongang allo'loranga je'ne' battua ri kollang bageang rateang.

³Nampa nia'mo tallu tau pagawena Hizkia mange angngagangi sicini' anjo perwira tantarana Asyur. Anjo tallua pagawe iamintu Elyakim ana'na Hilkia kapala ruma tanggana balla' lompoa, Sebna jurutulisi'na pa'rasanganga, siagang Yoah ana'na Asaf, juru tulisi'na balla' lompoa.

⁴Nakanamo anjo perwira tantarana Asyur ri ke'nanga, “Pabattuangi Karaeng Hizkia kananna karaeng Asyur angkana, ‘Angngapa nanukana kalennu kassa'?

⁵Nukanaka bicaraji bawang akkulle ansambeangi akkala' pa'bundukanga siagang kakassakanna tantaraya? Inaika nupattoang sa'gennu barani kamma angngewai Asyur?

⁶ Memang nurannuangi bantuanna Mesir, mingka anjo kammaya rapanji ammake poko' rea a'jari takkang; — sinampe' tepoki anjo takkanga nampa nato'do' limannu. Kammaminjo kagassinganna Mesir mae ri sikontu tau manrannuanga ri ia.’ ”

⁷Nampa nakanamo pole anjo perwira tantarana Asyur, “Yareka barang nukana manrannuangko mae ri Karaeng Allata'alanu? Ri wattunna naparentakang Hizkia sollanna sikamma tu Yehuda siagang tau niaka ri Yerusalem, ri dallekanna ngasenji bawang tampa' pakkoro'bangngang ri Yerusalem anggaukangi ibadana, sai apa naancuraka ia tonji anjo tampa' pakkoro'bangnganga siagang tampa'-tampa' panynyombanga ri Batara kalenna?

⁸Kamma-kamma anne inakke lalang arenna karaeng Asyur barania' ambotori angkanaya punna nisareko ruassa'bu jarang, mattantu tena sikamma anjo jaina tau akkulle andongkoki anjo jaranga.

⁹Manna perwira Asyur kaminang tunaya tena todong nukkulle angngewai. Mingka kamma nurannuanna tu Mesir akkiring kareta bundu' siagang pasukang a'jarang!

¹⁰Nukana battui ikambe ambunduki siagang ambetai pa'rasangannu natena Nibantui ikambe ri Batara? KalenNa Batara ansuroi ikambe battu ambunduki siagang angngancuruki pa'rasangannu.”

¹¹Nakanamo Elyakim, Sebna siagang Yoah ri anjo perwira tantarana Asyur, “A'bicara Aram maki' mae ri kambe karaeng, saba' napahanji ikambe a'bicara Aram. Teaki' ammakei bicara Ibrani, gassingka napahangi sallang anjo ra'ya' niaka rate ri anjo tembo' kotaya.”

¹²Appialimi anjo perwira tantara Asyur angkana, “Nukanaka ri kauji bawang siagang ri karaennuji kunisuro battu ri karaeng Asyur untu' ampabattui yangasenna anne? Anne bicaraya kupabattu tongi mae ri ra'ya' niaka ammempo irate ri anjo temboka, lanuaganga angkanrei tainnu siagang angnginungi mea kalennu.”

¹³Nampa ammenteng anjo perwira tantarana Asyur nammarrang lalang bicara Ibrani angkana, “Pilangngeri apa nakananga karaeng Asyur,

¹⁴‘Teako eroki nitipu ri Hizkia! Takkulleai ampasalamakko!

¹⁵Teako pilangngeri panynyonyo'na untu' manrannuang mae ri Batara. Teako kapangi angkana laNapasalamakko Batara yareka laNapisangkai tantara Asyur angngallei kotanu.

¹⁶Teako pilangngeri Hizkia! Inakke, Karaeng Asyur ampalaki sollannu assulu' ngaseng battu ri kotaya numanyara. Sinampe' akkulleko angnganre rappo anggoro' battu ri koko kalennu, siagang angkasiaki rappo ara battua ri poko' ara kalennu, siagang angnginung battu ri bungung kalennu,

¹⁷sa'gennu kupalette' mange ri pa'rasangang eroka sangkamma pa'rasangang kalennu. Anjoreng nia' koko anggoro' jaia wassele'na untu' ikau, siagang koko gandung assarea wassele' labu' untu' a'jari kanrenu.

¹⁸Teako pilangngeri Hizkia! Natipu jako bawang nanakana laNapasalamakko Batara. Le'bakkai nia' rewata bansa maraeng ampasalamaki pa'rasanganna battu ri kakoasangku?

¹⁹Kemaei rewata-rewatana pa'rasangang Hamat siagang Arpad? Kemae rewata-rewatana Sefarwaim? Niakka battu ampasalamaki Samaria?

²⁰Rewata kereanga le'ba' allappassangi pa'rasanganna battu ri kakoasangku? Kemae lakkulle Batara lampasalamaki Yerusalem!’ ”

²¹Nalangngere'na anjo, tenamo nappiali pandudu'na Yerusalem, saba' le'ba'mi niparentakang ke'nanga ri Karaeng Hizkia sollanna tena nakkana-kana ke'nanga.

²²Jari nakekke'mi pakeanna Elyakim, Sebna, siagang Yoah, tanra si'nana pa'mai'na ke'nanga, nampa a'lampa a'laporo' ri karaenga, anjo apa le'baka napau perwira tantarana Asyur.