Read Makassar Version – KITTA' MATANGKASA YESAYA 38 Bible Online

YESAYA 38 - Makassar Version – KITTA' MATANGKASA bible

YESAYA 38

¹Tabellayai ri anjo wattua, tu'guru' garrimmi Karaeng Hizkia, na'birimmo mate. Mangemi Na'bi Yesaya ana'na Amos antoaki, na nakana, “Appasangi Batara sollanna kipa'le'ba' baji urusanta, lanri tenamo kilammolle ri garrinta karaeng. Tasalloami nakimate.”

²Assailemi Hizkia mae ri temboka nampa appala' doang nakana,

³“O, Batara, Kiu'rangi laloi angkanaya inakke anne le'ba'ma' allayaniKi' siagang pa'mai' tamamminraku, kammayatompa situlusu'na atingku. Tuli kuusahaimi mannuruki ri erotTa.” Nampa angngarru' pacce Hizkia.

⁴A'lampanamo Na'bi Yesaya, Nisuromi ri Batara

⁵ammotere' poleang mange ri Hizkia nampa napabattu anne pasanga angkana, “INakke, Batara, Allata'ala nasombaya Daud boenu, Kulangngere'mi pappala' doannu siagang Kucini'mi je'ne' matannu. LaKutambai umuru'nu sampulo allima taung sallona.

⁶Ikau siagang kota Yerusalem laKupata'lappasakko battu ri karaeng Asyur. Anne kotaya laKula'langi.” Nampa nasuro Na'bi Yesaya taua akkota rappo ara nampa napasapu mae ri lattanna Hizkia sollanna ammolle ammotere'. Akkuta'nammi Karaeng Hizkia angkana, “Apa pammateina angkanaya laNapammollea' Batara siagang akkulle ija' a'lampa mange ri Balla'Na Batara?”

⁷Appialimi Yesaya angkana, “Iaminne pammatei Napassareanga Batara mae ri katte angkanaya Narupai janjinNa.

⁸Anjo taun-taunna mataalloa untu' a'jari pannanrai wattu bate pare'na Ahas, lammunduruki taun-taunga sa'genna sampulo garisi'.” Jari ammunduru'mi anjo taun-taunga sampulo garisi'.

⁹Ammollenamo ammotere' Karaeng Hizkia, annulisi'mi kelong pammuji kamma anne:

¹⁰Kukana, nampami sitangnga umurukku nakumusti a'lampamo, ampa'le'baki sesa tallasakku ri lino tau matea.

¹¹Kukana, talakucinikami Batara ri linoa anne, yareka accini' tau ri anne linoa.

¹²Tappu' nyawaku, battumi a'jalakku, rapang kema pakalawaki nibongkara'; rapang kaeng nipolong battu ri pattannungang; kukapangi laNapa'le'ba'mi Allata'ala tallasakku.

¹³La'busu' bangngia' ammarrang napakamma pa'risi', rapang nilicara' buku-bukungku ri singa; kukapangi laNapa'le'ba'mi Allata'ala tallasakku.

¹⁴Sa'rangku pila' ca'dimi na pila' lamma, rapang jangang-jangang bodobangkeng akkunrareng. Mangngammi matangku acconga nai' ri langi', Batara, Kilappassanga' battu ri anne kasusaanga.

¹⁵Apa akkulle kupau? Anne gau'Na Batara; takkullea' attinro lanri si'na.

¹⁶O, Batara, Kisarea' katallassang lanri kananTa siagang panggaukanTa boli'ma' kamma attallasa' untu' iKatte bawang.

¹⁷Pacceku tappinrai a'jari kasannangang, iKatte ampasalamaka' battu ri bahayaya; Kipammopporangi sikamma dosa-dosaku.

¹⁸Tena ampujiKi' lalang lino tau matea, tau matea takkulleai manrannuang ri tamamminraTa.

¹⁹Tuttallasa' bawang akkulle mammuji ri Katte, kamma kugaukanga anne alloa. Tutoa ancaritai ri ana'na ri tamaka tamamminraTa, o Batara.

²⁰Batara, iKatte ampamollea', jari makkelommi ikambe mammuji ri BallatTa akko'bi' kacapi, lalang sikontu tallasa'na ikambe.”