Read Makassar Version – KITTA' MATANGKASA YESAYA 40 Bible Online

YESAYA 40 - Makassar Version – KITTA' MATANGKASA bible

YESAYA 40

¹Kammai anne kananNa Allata'alanu, “Saleori, saleorimi bansaKu!

²Pakasannangi atinna tu Yerusalem, pauangi angkanaya lakala'busammi nipare' ata. Kupammopporammi salana, le'ba'mi Kuhukkung a'lappi rua sikamma dosana ke'nanga.”

³ Nia' kalangngerang sa'ra akkio' angkana, “Pasadiai oloanga ri parang lompoa untu' Batara. Lambusi agang lompoa ri parang lompoa untu' Allata'alata!

⁴Tunggala' ka'bunga musti nitambungi, monconga siagang buluka nilappari. Butta a'bontoa la'jari lapparaki, na ia a'buttu-buttua lanilaccuki.

⁵Nalanipa'nyata kala'biranNa Batara; sikontu rupataua lanasa'bi. Tojeng, KalenNa Batara le'ba' a'janji!”

⁶ Nia' sa'ra angkana, “Kabarrangi!” Akkuta'nanga', “Apa musti kukabarrang?” “Kabarrangi angkana rupataua rapang ruku', rapang bunga poro sinampe'ji ga'gana.

⁷Rukuka a'jari kalotoro', bungaya a'jari kalumeng, punna Napatui' Batara anging bambanga. Tojeng, anjo bansaya rapangi ruku'.

⁸Rukuka a'jari kalotoro', bungaya a'jari kalumeng, mingka kananNa Allata'alata attahangi satunggu-tungguna.”

⁹Naikko ri moncong tinggia, pa'la'bangi kabara' bajika mae ri Yerusalem! Akkiokko, pilompoi sa'rannu, pa'la'bangi kabara' bajika mae ri Sion! Paui mae ri kota-kotana Yehuda angkana labattui Allata'alana ke'nanga!

¹⁰ Ciniki, battui Karaeng Allata'ala siagang koasaNa ero' anggaukangi kaporeanNa. Nirurungang ri sikamma tau le'baka Nalappassang.

¹¹ Rapang sitau pakalawaki amparakai olo'-olo'Na; KalenNa ampa'rappungi ke'nanga. Ana'-ana' gimbalaka Nakalawingi, na Naemba baji'-baji' sikamma anronNa.

¹²Inai ambakuki tamparanga siagang pala' limanna, yareka angngukkuruki allaka siagang pa'lama'na? Inai ambakuki buttaya siagang pa'baku' yareka antimbangi monconga siagang buluka ammake dacing?

¹³ Inai ampimpingi Batara, yareka angngajaraKi a'jari tumappakainga' mae ri Ia?

¹⁴Inai Napakkuta'nangngi Batara sollanna anggappa pangngassengang siagang pammahang? Inai assarei pitunju' untu' angngalle tindakang cocoka?

¹⁵Rapanji siatti' je'ne' lalang se'ro' bansa-bansaya mae ri Batara, rapang silisere' limbu'bu' ri timbangang; pulo-puloa sangkammaji ringanna au alusuka.

¹⁶Sikontu olo'-olo' ri romanna Libanon tagannakai lanipa'jari koro'bang nitunu; sike'de' duduji poko'-poko' kayuna lanipa'jari kayu tunuang.

¹⁷Sikontu bansaya tena anggaranna mae ri Ia, rapang tena apa-apa ri dallekanNa.

¹⁸ Jari inai lanupasinrapangangi Allata'ala? Inai nukana Naagang sangkamma?

¹⁹Tena Nasangkamma patung napareka tukang-tukang, patung nilapisika bulaeng siagang nilapaka pera'.

²⁰Tau tenaya kullena ammali bulaeng yareka pera', ammilei kayu takkullea linta' panra'. A'boyai tukang panrea untu' appare' patung tenaya nagampang ta'lengga.

²¹Maka tanuassengai siagang tanulangngerai, siagang tena nanipauangko battu riolo? Maka tena nanupahangi battu riolo antekamma pakaramulana linoa?

²²Mappa'jarina ammempoi ri empoang kala'biranNa irate ri bundala'na linoa, pandudu'na buttaya ca'di nicini' rapang katimbang. Naka'rangi langika rapang kaeng, nampa Napasang rapang kema untu' nipammantangngi.

²³Napa'jari tena kullena tau makoasaya, na tumalompoa tappela'mi kakoasanna.

²⁴Rapangi ke'nanga lamungang lolo, beru accu'laka aka'na. Punna Napatui' Batara anginga, kalotoro'mi ke'nanga na niri'bakang rapang rarame.

²⁵Inai nukana sangkammanNa Batara Kaminang Matangkasaka? Inai ero' lanupasangkammangi?

²⁶Ciniki langika, siagang parhatikangi! Inaika ampa'jari sikamma bintoenga? Ia angngatoroki ke'nanga rapang pasukang, Naassengi angkana siapa jaina ke'nanga, nampa massing Nasare areng. Tena manna se're tappela', lanri lompona koasaNa Batara!

²⁷Jari he Israel, angngapa nukkunrareng, kamma angkana taNaassengai Karaeng Allata'ala susanu? Kamma angkana taNajampangiai sarennu, natena Naparhatikangi ha'nu?

²⁸Maka tanuassengai siagang tanulangngerai? Batarami Allata'ala mannannungang, ampa'jari sikontu buttaya. Tale'bakai mangngang yareka poso; takkulleai niselangngi pikkiranNa.

²⁹Napakajarreki tau posoa, Nasarei sumanga' tau tenaya kullena.

³⁰Tau rungkaya a'jari mangngangi siagang posoi ana'-ana' beru bakkaka tu'guruki lanri tatto'ro.

³¹Mingka tau manrannuanga ri Batara, langgappai kagassingang beru. Rapangi ke'nanga jangang-jangang rajawali anri'ba' tinggia siagang kagassingang ka'nyi'na. Lari ke'nanga na tena naposo, a'jappai ke'nanga natena na'jari mangngang.