Read Makassar Version – KITTA' MATANGKASA YESAYA 42 Bible Online

YESAYA 42 - Makassar Version – KITTA' MATANGKASA bible

YESAYA 42

¹ Nakana Batara, “Iaminne atangKu Kururunganga, tunipileKu appakasannanga ri atingKu. Le'ba'mi Kusare koasaKu, untu' angngerang kaadelang mae ri tunggala' bansaya.

²Tena nalammarrang yareka akkio' lompo, tena nalakalangngerang sa'ranna ri aganga.

³Bulo ta'dundua talanatepokai, kanjoli ca'dia rinrana talanabunoai. Majarreki lanapa'nyata katojenganga,

⁴tena naranggasela yareka tappu' minasa, sa'genna nipaenteng kaadelanga ri lino. Sikamma pa'rasangang bellaya nakkuki ri pangngajarranna.”

⁵ Karaeng Allata'ala ampa'jari siagang angka'rangi langika; Ia ampareki buttaya siagang sikamma attimboa rateanna. Nasarei rupataua nappasa' katallassang siagang nyawa. Napabattui pasang kammaya anne mae ri atanNa,

⁶ “INakke, Batara, angkiokko siagang assareko tugasa' untu' ampajappai kaadelanga. Kurenrengko siagang Kuparakaiko untu' a'jari parjanjiang mae ri umma' rupataua, untu' a'jari singara' mae ri sikontu bansaya.

⁷Untu' ansungkei matanna tau butaya, siagang allappassangi taua battu ri sassanna tarungkua.

⁸INakke Batara, iaminjo arengKu; taKupassareangngai kala'birangKu manna ri nai; masahorokKu taKupassareangngai mae ri patunga.

⁹Kamma-kamma anne apa le'baka Kutappu riolo kajariammi; erokKa' pole ampabattui passala' berua; ri tenanapa nakajariang anjo, Kupau riolomi mae ri kau.”

¹⁰Akkelongko kelong beru mae ri Batara, pujimi Batara, he sikontu linoa! Ammarrung mako, he tamparanga siagang sikontu bonena, sikamma pa'rasangang bellaya siagang sikontu pandudu'na!

¹¹Sikamma parang lompoa siagang kota-kotaya, mammujiko ri Batara, baji'mi na mammuji ri Batara pandudu'na Kedar! Pandudu'na kota Sela, akkio' rannuko, akkio'-kiokko battu rate ri coppo'na monconga!

¹²Boli'mi kamma napakala'biri' Batara ke'nanga, na napa'la'bang arenNa ri sikamma pa'rasangang bellaya.

¹³Majui Batara a'bundu' rapang se're tubarani, rapang tantara lompo sumanga'na a'bundu'. Ammarrangi, akkio' ri pa'bundukang, na Napappicinikang kaporeanNa mae ri musua.

¹⁴Nakana Allata'ala, “SalloMa' tamakkana-kana; Kutahangi KalengKu, naKua'mereki. Kamma-kamma anne narapi'mi wattungKu untu' angngalle tindakang, erokKa' ammarrang rapang baine ammanaka.

¹⁵LaKupa'jari kalotoroki monconga siagang buluka, Kupa'jari kalumeng sikontu timbo-timboanna. Kupinrai ka'bung binangaya a'jari parang lompo, sikontu kollang lompoa Kupa'jari kalotoroki.

¹⁶BansaKu butaya laKurenrengi angngolo rioloang tenaya naassengi ke'nanga; laKurenrengi ke'nanga ri agang tenaya naassengi ke'nanga. Sassanga Kupa'jari singaraki mae ri ke'nanga, na oloang a'buttu-buttua Kulappari. Iaminjo laKugaukang mae ri ke'nanga, siagang attantumi laKugaukanna.

¹⁷Tau tappaka mae ri patung barhalaya na naakui ke'nanga a'jari allata'alana, lanihinai siagang lanipakasiriki.”

¹⁸Nakana Batara, “Pilangngeri, he sikamma tau tongoloka! Ciniki, he sikamma tau butaya!

¹⁹Inai la'bi buta na atangKu Israel? Inai la'bi tongolo' na tunisuroKu?

²⁰Israel, jai nucini', mingka tena nuparhatikangi, tassungkei tolinnu, mingka tena nullangngere'.”

²¹Mangngellai Batara appasalama'; Nakellai nipakalompo siagang nipakala'biri' hukkunNa.

²²Mingka la'busu'mi niella' anjo bansaya; nitahangi ke'nanga lalang ri kamara'-kamara' rawa butta, nitongkoki lalang ri sikamma tarungkua. A'jari tuniella'mi ke'nanga, natena battu antulungi.

²³Inai ri kau ampilangngeri anne passalaka, siagang amparhatikangi untu' situlusu'na?

²⁴Inai ampassareangi Israel untu' nirampasa'? Sai KalenNa tonji Batara? Ri Ia maki' doraka, tena nittallasa' situru' parentaNa, siagang tena nimannuruki ri ajaranNa.

²⁵Jari nikasia'mi pangngalarroi heba'Na, sessa maki' lanri pa'bundukang lompo. PangngalarroinNa rapangi pepe' angkanrei Israel, mingka taniassengai kalenta, siagang tena nippilajara' battu ri apa le'baka nikasia'.