Read Makassar Version – KITTA' MATANGKASA YESAYA 48 Bible Online

YESAYA 48 - Makassar Version – KITTA' MATANGKASA bible

YESAYA 48

¹Pilangngeri, he turunganna Yakub, turunganna Yehuda ammakea areng Israel, nukana numangakui Allata'alana Israel, siagang assumpako lalang arenNa Batara. Mingka tena nannarrusu' kana-kanannu antama' ri atinnu.

²Mingka manna nakamma, lompoi pa'mai'nu ammangakui angkana ikau pandudu'nako kota matangkasaka; angkanaya ikau tanjengko mae ri Allata'alana Israel niarenga Batara Kaminang Makoasaya.

³Nakana Batara, “Pilangngeri, he Israel! Apa kajarianga riolo, sallomi le'ba'na Kupau riolo; apa Kupaua, ti'ring Kugaukangi siagang Kupa'nyatai.

⁴Kuassengi angkanaya ikau sanna' terasa'na pa'mai'nu, terasaki ulunnu siagang kapala batuko.

⁵Jari battu riolo iji naKutappu memang; ri tenanapa nakajariang, le'ba' memammi Kupau; sollanna tena nanungkana, angkanaya anjo panggaukanna patung-patung barhalanu.

⁶Sikontu apa Kutappua, nulangngereka battu ri Nakke, kajariammi; musti numangakui angkanaya kammatojengi kanangKu. Kamma-kamma anne KupauangKo siapa are passala' beru, rahasia-rahasia tenayapa nuassengi.

⁷Kamma-kammapi anne naKupa'jari, teai riolo; tale'bakapi nulangngere' anjo passalaka, sollanna takkulleako angkana, angkanaya sikontuna nuasseng ngasengi.

⁸Kuassengi angkanaya takkulleako nipatappa', battu rioloji numasahoro' angkana tunungai doraka. Lanri kammana minjo na tanuassenga, tena manna sibuku kana battu mae ri tolinnu.

⁹Kuparrangngi larroKu sollanna nipa'la'bang arengKu. Kutahangi untu' ikau, sollanna tena nipanrakiko.

¹⁰Kuso'riko lalang ri pepe' kasessanga, rapang pera' nipakati'noka lalang ri pepeka.

¹¹Kugaukangi anjo kammaya untu' KalengKu, saba' taKupa'biangai arengKu nira'massi; tena Kubagei kala'birangKu manna pole ri nai.”

¹² Nakana Batara, “Pilangngeri he Israel, umma' Kukioka, iNakke tuli Allata'alanu. INakkemi uru-urua, siagang iNakke tommi kala'busanga.

¹³LimangKu ampadongkoki dasara'na buttaya siagang ampaka'rangi passimbanga. Punna Kukioki arenna, lintaki battu ke'nanga.

¹⁴A'rappungang ngaseng mako siagang pilangngeri! Ri sikamma rewata-rewataya tena le'ba' antappu rioloi angkanaya lanibunduki Babel ri tunipileKu; lanagaukangi apa Kukaerokia.

¹⁵INakkemi ampaui siagang angkioki, anrurungangi, sa'genna a'jari apa nagaukanga.

¹⁶Battu mako a'reppese' mae ri Nakke siagang pilangngeri, battu riolo iji Ku'bicaramo silambusu'na; na sikamma kanangKu tuli Kupa'rupai.” Kamma-kamma anne Nasuroa' Karaeng Allata'ala siagang Nasarea' koasa KalenNa.

¹⁷Nakana Allata'ala matangkasa'na Israel, Mappasalama'nu, “INakke Karaeng Allata'alanu, angngajarakako apa a'matu-matua ri kalennu, anrurungangako ri agang mustia nuolo.

¹⁸Ebara' angkana nuparhatikangi sikamma parentaKu, lasalewangangko rapang binanga tenaya nale'ba' kalotoro', laupakko rapang bombang ri tamparang tenaya nale'ba' ammari-mari.

¹⁹Turungannu lajai rapang lisere' kassika; Kutanggongi angkanaya talanipanrakiai ke'nanga.”

²⁰ A'lampako siagang lariko battu ri Babel, pa'la'bangi anne kabaraka ri kere-keremae. Kabarrangi siagang pakkio' rannu, angkana: “Le'ba'mi Napasalama' Batara atanNa, Israel!

²¹Wattunna Narurungang ke'nanga allalo ri parang kalotoroka, tena nasessa ke'nanga napakamma turere. Napuei Batara moncong batua nampa appasolong je'ne' battu ri batuai Napassulukang je'ne' ke'nanga.

²² Tena kasalamakkang mae ri tau ja'dalaka,” Kammaminjo kananNa Batara.