Read Makassar Version – KITTA' MATANGKASA YESAYA 49 Bible Online

YESAYA 49 - Makassar Version – KITTA' MATANGKASA bible

YESAYA 49

¹ Pilangngeria', he sikamma pa'rasangang bellaya parhatikangi kana-kanangku. Nakio' memamma' Batara ri tenanapa kunilassukang, Napile memamma' bakukku nitianangngang.

² Napa'jari tarangi kana-kanangku rapang pa'dang, lima KalenNa anjagaia'. Napa'jaria' rapang ana' pana nikantisika, nakuNaboli' lalang ri tongkaya nipasadia untu' nipake.

³Nakana ri nakke, “Ikaumi atangKu; lanipakala'birikKa' lanri ikau.”

⁴Mingka kukana, “Tena matu-matunna posoku; la'busu' sia-siaji kagassingangku!” Mingka tappaka' angkana Napattojengi Batara hakku, Nabalasakka' Allata'ala situru' panggaukangku.

⁵Ri tenanapa kulassu', Nakioka' Batara a'jari atanNa, untu' ampasse'rei umma' Israel, sollanna ammotere' ke'nanga mae ri Ia. Napa'jaria' Batara tunipakalompo, Allata'ala a'jari kagassingangku.

⁶ Nakana Batara ri nakke, “He atangKu, attayangi tugasa' lompoanganga ri kau; tena nanupoterang bawang sesa turunganna Yakub siagang nupoterang kalompoanna suku-suku Israel, mingka Kupa'jari tongko singara' mae ri bansa-bansaya, sollanna nipasalama' sikontu bonena linoa.”

⁷Nakana Allata'ala matangkasa', Mappasalama'na Israel, mae ri tu nihina dudua, siagang nikabirisia ri bansa-bansaya kammayatompa a'jari ataya ri sikamma tukoasaya, “Sikamma karaenga lanaciniki panggaukangKu; lambangungi ke'nanga ampakalompoA'. Sikamma tukoasaya lanacini' tongi, nampa su'ju' anynyomba.” Kajariangi anjo kammaya lanri le'ba'mi Napile Batara atanNa; Allata'ala matangkasa'na Israel majarreki ri janjinNa.

⁸ Nakana Batara ri umma'Na, “Punna mangngellaiA', lappialiA'; ri allo appasalamakKu, laKutulungko. Kula'langiko siagang Kujagaiko, siagang Kupa'jariko parjanjiang mae ri bansa-bansaya. Kupa'jari bajiki ammotere' pa'rasangang sinoa a'jari butta pisaka nipammantangia.

⁹Tau nitarungkua Kusuroi assulu'; tau niaka lalang ri sassanga Kuerangi mae ri singaraka. Ba'lalo manna ri bulu' a'gondoloka tena nalakakurangang ke'nanga, ri sikontu oloanna nia' sadia kanre.

¹⁰ Tena nalaturere yareka cipuru' ke'nanga, siagang talanitujuai ri bambang allo ri parang lompoa. Saba' iNakke ansayangi ke'nanga, lanrurungangi ke'nanga, siagang langngerangi ke'nanga mange ri sikamma timbuseng je'neka.

¹¹LappareKa' oloang allaloa ri monconga, laKulappari ngasengi sikontu agang lompoKu.

¹²Battu bellai ummakKu para battu, battu wara', battu lau' siagang battu ri kota Sinim bageang timboro'.”

¹³Akkelongko he langika, akkio' rannuko he buttaya, he sikamma monconga, akkio' rannuko! Saba' niaki battu Batara ansaleori umma'Na, Nakamaseangi umma'Na nijallakkanga.

¹⁴Mingka nakana pandudu'na Yerusalem, “Nabokoi maki' Batara, Nakaluppai maki' Batarata.”

¹⁵Appialimi Batara, angkana, “Maka akkullei se'rea amma' angkaluppai ana'na, siagang tanasayangnga ana' kalenna? Manna pole na nakaluppai, mingka iNakke tena nalaKukaluppaiko!

¹⁶O, Yerusalem, tuli langngu'rangiA' mae ri kau; laKutulisiki arennu ri pala' limangKu.

¹⁷Sikamma tau eroka ambangungko labattui linta', siagang tau le'baka angngancurukko la'lampai.

¹⁸Ciniki siagang parhatikangi niaka ri tammulilinu, a'rappungammi ra'ya'nu battu mae ri kau. Lanri iNakke, Allata'ala mattallasaka, Kukana, tojeng, lalompoi pa'mai'nu lanri pandudu'nu, rapang bunting baine lompoa pa'mai'na lanri belo-belona.

¹⁹Pa'rasangannu rosoka siagang sino sikalia kamma-kamma anne a'jari seppa' dudumi mae ri tau eroka ampammantangngi. Na tau eroka ampanrakiko, a'lampami bella battu ri kau.

²⁰Ana'-ana' lassuka ri pa'rasangang maraeng lanakana ri kau, ‘Anne pa'rasanganga seppa' dudui ri nakke, sarea' tampa' sollangku akkulle ammantang anrinni.’

²¹Jari lanukana lalang ri pa'mai'nu, ‘Inaika allassukangi anjo ana'-anaka untu' inakke? Sai inakke tappela' ngasemmi ana'-anakku, na kutakkulleamo pole ammana'? Inakke nilalinga' mae ri butta pammelakkanga na kunipakabella siagang niboli' kale-kalengku. Battu kemae ngasengi anjo sikamma ana'-anaka, siagang inai ampakalompoi ke'nanga?’ ”

²²Nakana Batara Kaminang Tinggia mae ri umma'Na, “LaKusarei pammatei bansa-bansaya na lanapoterang ana'-ana'nu; ana'-ana'nu bura'nea lanakalawingi, na ana'-ana'nu bainea lanapisangi rate ri salangganna.

²³Sikamma karaenga larapangi mangge mae ri kau, na sikamma karaeng bainea a'jari amma' mae ri kau. La'su'juki ke'nanga ampakalompoko siagang napakatuna kalenna mae ri kau. Na lanuassemmo angkanaya iNakke anne Batara; tau manrannuanga ri Nakke tena nala'ba pa'mai'na.”

²⁴Akkuta'nang ngasengko angkana, “Maka lakkullei nialle barang rampasanga battu ri se'rea tubarani, yareka tunitahanga nialle battu ri ta'galanna tau pallaka?”

²⁵Appiali Batara angkana, “Iaminjo lakajariang. Tunitahanna tubarania lanirampasaki ammotere'. Barang narampasa'na tau pallaka lanirampasaki ammotere'. Saba' iNakke KalengKu langngewai musunnu; laKupasalamaki sikamma ana'-ana'nu.

²⁶LaKupa'jari sikamma musunnu palla' ero' ammuno, sa'genna para ia sibuno-buno. Nalanaasseng sikontu umma' rupataua, angkanaya iNakke, Batara, Mappasalama'nu; Kaminang Kassaka, Allata'alana Yakub, Mappasulu'nu.”