Read Makassar Version – KITTA' MATANGKASA YESAYA 57 Bible Online

YESAYA 57 - Makassar Version – KITTA' MATANGKASA bible

YESAYA 57

¹Tau bajika siagang annabaya matei, natena tau ampahangi siagang amparhatikangi. Punna mate ke'nanga, ta'lappasaki ke'nanga battu ri balaya nampa sannang ammari-mari.

³Mingka ikau ngaseng tau dorakaya, battu mako mae untu' niadeli! Tena nubajikangngang na pabale'-bale' mataya, siagang tau nangaia a'gau' bawang kammayatompa baine pagau' salaya!

⁴Inai nukakkali? Inai nucau-cau? Sai ikau turungang paballe-balleko siagang turungang tau nangaia angngewa?

⁵Anynyombako ri rewata-rewata kacopponganga siagang nupassareang kalennu anturukiangi hawa napasunu irawanganna poko'-poko' kayu karama'nu. Nutarawangi sikamma ana'nu lalang ri binangaya, ri alla'-alla'na batua.

⁶Jari siratangko appasse're batu-batu laccu' battu anjoreng. Iaminjo bageannu! Ia tomminjo batu-batua nutiriki anggoro'nu nusare gandung. Nukapangi angkana sannangA' anciniki yangasenna anjo kammaya?

⁷A'lampako mange ri coppo'-coppo'na monconga untu' assare koro'bang siagang ampassukkuki hawa napasunu.

⁸Attannangko patung-patung rantasa' ri dallekang pakke'bu' balla'nu. NubokoiMa' iNakke. Nupasuluki pakeannu nampa naikko ri katinroang napakaluaraka bayuannu nugajia untu' nuagang sikatinroang, nampa nupassukku' hawa napasunu.

⁹Ammakeko minynya'-minynya' mabau', nampa a'lampako mange anynyomba ri rewata niarenga Molokh. Nukiringi sikamma tunisuronu mange ri pa'rasangang-pa'rasangang bellaya, ba'lalo mange ri lino tau matea.

¹⁰Tena natappu' minasannu nuposoi kalennu amboyai rewata-rewataya. Nukapangi angkana akkullei ke'nanga assareko sumanga' beru, sa'genna tena nu'jari lamma.

¹¹Nakana Batara, “Inaika anjo rewata-rewata ampajariako malla', sa'gennu a'balle-balle siagang tenamo nungngu'rangi mae ri Nakke? Apaka tenamo nunynyomba mae ri Nakke lanri sallo duduKumo tamakkana-kanaya?

¹²Mingka Kupauangko angkanaya, anjo kabajikannu anu nupare'-pare', na sikontu panggaukannu tena matu-matunna mae ri kalennu.

¹³Punna ammarrangko, lappassammi na napasalamakko anjo patung-patunga! Latappelaki ke'nanga niri'bakang ri anging siagang lalanynyaki lalang sipa'maikang nappasa' bawang! Mingka tau a'la'langa mae ri Nakke lanawarisiki anjo pa'rasanganga siagang anynyomba mae ri Nakke ri BallakKu.”

¹⁴Nia' tau angkana, “Pareki siagang pasadiai oloanna ummakKu, pakabellai sikontu anrompaia.”

¹⁵Saba' kammaminne kananNa Allata'ala Kaminang Tinggia na matangkasa', makoasaya sa'genna satunggu-tungguna, “AmmantangA' ri tampa' tinggia siagang tangkasaka, mingka ammantang tongA' ri alla'na tau tuna pa'maika siagang tau assesse' lalanga lanri dosa-dosana, untu' ampamollei sumanga'na siagang panrannuanna ke'nanga.

¹⁶Tena natuli laKusalakang ummakKu; tena nauntu' situlusukKu lalarro, sollanna tena natappu' sumanga' ke'nanga, nasaba' iNakke ampattallasaki ke'nanga.

¹⁷Dosa lanri ngoana ke'nanga ampakanassuA', lanri kammana naKuhukkung siagang Kubokoi ke'nanga. Mingka terasa' dudui ulunna ke'nanga na tuli ero'na naturukiang.

¹⁸Kucini'mi panggaukanna ke'nanga, mingka laKupakabaji' tonji ke'nanga. LaKururungangi siagang laKutulungi ke'nanga siagang Kusaleori tau si'naya pa'mai'na.

¹⁹ LaKusarei kasannangngang sikontu taua, baji' tau ambania kammayatompa tau bellaya. LaKupakabajiki ummakKu.

²⁰Mingka tau ja'dalaka rapangi tamparang a'bombanga siagang tenaya nale'ba' sannang. Lo'loro'na angngerangi loro siagang peo'.

²¹ Tena kasannangngang mae ri tau dorakaya,” Nakana Batara.