Read Makassar Version – KITTA' MATANGKASA YESAYA 60 Bible Online

YESAYA 60 - Makassar Version – KITTA' MATANGKASA bible

YESAYA 60

¹Ambangungko nai' siagang a'jariko singara', he Yerusalem, saba' nia'mi battu singara' kasalamakkannu; Allata'ala ansingariko siagang kala'biranNa.

²Nikalimbuki buttaya ri sassang, nitongkoki bansa-bansaya ri le'leng pakka'; mingka ammumbai singara'Na Batara irateannu, caya kahaderanNa a'nyatai irateannu.

³A'balulungi bansa-bansaya battu mange ri singara'nu, nikontaki sikamma karaenga ri caya ammumbaya mae ri kau.

⁴Ciniki apa kajarianga ri tammulilinu; ra'ya' a'rappunga untu' ammotere' mae ri kau. Ana'-ana' bura'nenu niaki battu bella, ana'-ana' bainenu nikalawingi.

⁵Lannasa' mako nucini'na anjo siagang accayami rupannu; dinging-dingingi siagang lompoi pa'mai'nu. Nierangi barang-baranna sikamma bansaya mae ri kau, nitambungiko ri kakalumanynyangang battu ba'leang tamparanga.

⁶Nikatulungi pa'rasangannu ri unta jaia, battua ri Midian siagang Efa. Tu battua ri Syeba angngerangi bulaeng siagang kamanynyang, na napuji-puji gau'Na Batara.

⁷Bembe siagang gimbala' battua ri Kedar nierangi mae ri kau sadiai gimbala' laki battua ri Nebayot untu' ibadanu. Anjo koro'banga napakasannangi atinNa Batara napaccayai Balla'Na rassia kala'birang.

⁸Apa kutadeng anjo allayanga rapang rammang rapang bodobangkeng anri'baka ammotere' ri tampa'na?

⁹Iaminjo sikamma kappala' battua a'labu angngerangi umma'Na Batara ammotere' battu ri pa'rasangang bella. Angngerang tongi pera' siagang bulaeng untu' mammuji ri Karaeng Allata'alanu; mae ri Allata'alana Israel Kaminang matangkasaka, ampa'jariai umma'Na nipakalompo.

¹⁰Nakana Batara mae ri Yerusalem, “Bansa maraeng lambangungi ammotere' kalli' tembo'nu, siagang lanalayaniko sikamma karaenga. Riolo Kuhukkungko lalang larroKu, mingka kamma-kamma anne ero'Ma' angkamaseangko.

¹¹ Allo bangngi latassungke pakke'bu' lomponu, sollanna akkulle nierang mae ri kau kakalumanynyanganna sikamma bansa-bansaya, siagang sikamma karaenna ke'nanga nitahanga.

¹²Bansaya siagang kakaraengang tenaya natundu' ri kau, laancuruki siagang lalanynyaki.

¹³Kalompoanna romang Libanon lanilalingi mae ri kau poko' kayu berangang, camara, siagang eru untu' ampaccayai BallakKu, siagang angga'gai tampa' pangngonjokangKu.

¹⁴ Ana'-ana'na tau anjallakkangiako battui su'ju', ia le'baka anghinako la'dundui, lanigallarakko ‘KotaNa Batara’, ‘Sion, Kota Allata'ala Matangkasa'na Israel’.

¹⁵Tena nulanibokoi siagang tena nulanikabirisi', siagang tena nulanibalang parekang a'jari sino. Kupa'jariko nikalompoang pa'maika satunggu-tungguna, tampa' karannuang mannannungang.

¹⁶Laniparakaiko ri bansa-bansaya siagang sikamma karaenga, rapang sitau amma' amparakai ana'na. Nanuassemmo angkana iNakke Batara, Mappasalama'nu, angkanaya Allata'alana Israel makassaka allappassangko.

¹⁷AngngerangA' bulaeng sambenna tambagaya siagang pera' sambenna bassia. AssareA' tambaga a'jari sambenna kayua, siagang bassi a'jari sambenna batua. Pa'rasangannu laKupa'jari amangi siagang sannangi, na niparenta siagang adele'.

¹⁸Tenamo kabara'na nikanaya katerassang nigaukang ri pa'rasangannu, nikanaya kaancuranga siagang karuntungang ri daeranu. RapangA' tembo' lanjagaiko, nalanupujiA' a'jari mappasalama'nu.

¹⁹ Tena nuparallu nisingari ri allo ri wattu singaraka, siagang tena nuparallu nisingari ri bulang punna bangngi. Saba' iNakke Batara, la'jari singara' mannannungang mae ri kau, Kusingariko siagang kala'birangKu.

²⁰Lania' untu' ikau allo tenaya nale'ba' labu, siagang bulang tenaya nale'ba' assoloro'. Saba' iNakke Batara, la'jari singara' mannannungang mae ri kau, le'ba'mi sallang wattu kasusannu.

²¹Lannabai tindakanna pandudu'nu, lanapatangi ke'nanga pa'rasanganga satunggu-tungguna. Rapangi ke'nanga lamungang Kucangkoka KalengKu, untu' ampa'nyatai kala'birangKu.

²²Ba'lalo manna kaluarga ca'dia siagang tunaya la'jari bansa lompo siagang kassa'. INakke Batara langngalle tindakang linta', ri wattu kaminang bajika.”